מלכים ב 1 : 1 (ALEP)
א ויפשע מואב בישראל אחרי מות אחאב
מלכים ב 1 : 2 (ALEP)
ב ויפל אחזיה בעד השבכה בעליתו אשר בשמרון--ויחל וישלח מלאכים ויאמר אלהם לכו דרשו בבעל זבוב אלהי עקרון אם אחיה מחלי זה  ס
מלכים ב 1 : 3 (ALEP)
ג ומלאך יהוה דבר אל אליה התשבי קום עלה לקראת מלאכי מלך שמרון ודבר אלהם--המבלי אין אלהים בישראל אתם הלכים לדרש בבעל זבוב אלהי עקרון
מלכים ב 1 : 4 (ALEP)
ד ולכן כה אמר יהוה המטה אשר עלית שם לא תרד ממנה כי מות תמות וילך אליה
מלכים ב 1 : 5 (ALEP)
ה וישובו המלאכים אליו ויאמר אליהם מה זה שבתם
מלכים ב 1 : 6 (ALEP)
ו ויאמרו אליו איש עלה לקראתנו ויאמר אלינו לכו שובו אל המלך אשר שלח אתכם ודברתם אליו כה אמר יהוה המבלי אין אלהים בישראל אתה שלח לדרש בבעל זבוב אלהי עקרון לכן המטה אשר עלית שם לא תרד ממנה--כי מות תמות
מלכים ב 1 : 7 (ALEP)
ז וידבר אלהם--מה משפט האיש אשר עלה לקראתכם וידבר אליכם את הדברים האלה
מלכים ב 1 : 8 (ALEP)
ח ויאמרו אליו איש בעל שער ואזור עור אזור במתניו ויאמר אליה התשבי הוא
מלכים ב 1 : 9 (ALEP)
ט וישלח אליו שר חמשים וחמשיו ויעל אליו והנה ישב על ראש ההר וידבר אליו איש האלהים המלך דבר רדה
מלכים ב 1 : 10 (ALEP)
י ויענה אליהו וידבר אל שר החמשים ואם איש אלהים אני תרד אש מן השמים ותאכל אתך ואת חמשיך ותרד אש מן השמים ותאכל אתו ואת חמשיו
מלכים ב 1 : 11 (ALEP)
יא וישב וישלח אליו שר חמשים אחר--וחמשיו ויען וידבר אליו איש האלהים כה אמר המלך מהרה רדה
מלכים ב 1 : 12 (ALEP)
יב ויען אליה וידבר אליהם אם איש האלהים אני תרד אש מן השמים ותאכל אתך ואת חמשיך ותרד אש אלהים מן השמים ותאכל אתו ואת חמשיו
מלכים ב 1 : 13 (ALEP)
יג וישב וישלח שר חמשים שלשים--וחמשיו ויעל ויבא שר החמשים השלישי ויכרע על ברכיו לנגד אליהו ויתחנן אליו וידבר אליו איש האלהים תיקר נא נפשי ונפש עבדיך אלה חמשים בעיניך
מלכים ב 1 : 14 (ALEP)
יד הנה ירדה אש מן השמים ותאכל את שני שרי החמשים הראשנים ואת חמשיהם ועתה תיקר נפשי בעיניך  ס
מלכים ב 1 : 15 (ALEP)
טו וידבר מלאך יהוה אל אליהו רד אותו אל תירא מפניו ויקם וירד אותו אל המלך
מלכים ב 1 : 16 (ALEP)
טז וידבר אליו כה אמר יהוה יען אשר שלחת מלאכים לדרש בבעל זבוב אלהי עקרון--המבלי אין אלהים בישראל לדרש בדברו לכן המטה אשר עלית שם לא תרד ממנה--כי מות תמות
מלכים ב 1 : 17 (ALEP)
יז וימת כדבר יהוה אשר דבר אליהו וימלך יהורם תחתיו  פ   בשנת שתים ליהורם בן יהושפט מלך יהודה  כי לא היה לו בן  ס
מלכים ב 1 : 18 (ALEP)
יח ויתר דברי אחזיהו אשר עשה  הלוא המה כתובים על ספר דברי הימים--למלכי ישראל  פ

1 2 3 4 5 6 7 8 9 10 11 12 13 14 15 16 17 18