דברי הימים ב 9 : 1 (ALEP)
א ומלכת שבא שמעה את שמע שלמה ותבוא לנסות את שלמה בחידות בירושלם בחיל כבד מאד וגמלים נשאים בשמים וזהב לרב ואבן יקרה ותבוא אל שלמה ותדבר עמו את כל אשר היה עם לבבה
דברי הימים ב 9 : 2 (ALEP)
ב ויגד לה שלמה את כל דבריה ולא נעלם דבר משלמה אשר לא הגיד לה
דברי הימים ב 9 : 3 (ALEP)
ג ותרא מלכת שבא את חכמת שלמה--והבית אשר בנה
דברי הימים ב 9 : 4 (ALEP)
ד ומאכל שלחנו ומושב עבדיו ומעמד משרתיו ומלבושיהם ומשקיו ומלבושיהם ועליתו אשר יעלה בית יהוה ולא היה עוד בה רוח
דברי הימים ב 9 : 5 (ALEP)
ה ותאמר אל המלך אמת הדבר אשר שמעתי בארצי--על דבריך ועל חכמתך
דברי הימים ב 9 : 6 (ALEP)
ו ולא האמנתי לדבריהם עד אשר באתי ותראינה עיני והנה לא הגד לי חצי מרבית חכמתך יספת על השמועה אשר שמעתי
דברי הימים ב 9 : 7 (ALEP)
ז אשרי אנשיך ואשרי עבדיך אלה--העמדים לפניך תמיד ושמעים את חכמתך
דברי הימים ב 9 : 8 (ALEP)
ח יהי יהוה אלהיך ברוך אשר חפץ בך לתתך על כסאו למלך ליהוה אלהיך באהבת אלהיך את ישראל להעמידו לעולם ויתנך עליהם למלך לעשות משפט וצדקה
דברי הימים ב 9 : 9 (ALEP)
ט ותתן למלך מאה ועשרים ככר זהב ובשמים לרב מאד--ואבן יקרה ולא היה כבשם ההוא אשר נתנה מלכת שבא למלך שלמה
דברי הימים ב 9 : 10 (ALEP)
י וגם עבדי חירם (חורם) ועבדי שלמה אשר הביאו זהב מאופיר--הביאו עצי אלגומים ואבן יקרה
דברי הימים ב 9 : 11 (ALEP)
יא ויעש המלך את עצי האלגומים מסלות לבית יהוה ולבית המלך וכנרות ונבלים לשרים ולא נראו כהם לפנים בארץ יהודה
דברי הימים ב 9 : 12 (ALEP)
יב והמלך שלמה נתן למלכת שבא את כל חפצה אשר שאלה מלבד אשר הביאה אל המלך ותהפך ותלך לארצה היא ועבדיה פ
דברי הימים ב 9 : 13 (ALEP)
יג ויהי משקל הזהב אשר בא לשלמה בשנה אחת--שש מאות וששים ושש ככרי זהב
דברי הימים ב 9 : 14 (ALEP)
יד לבד מאנשי התרים והסחרים מביאים וכל מלכי ערב ופחות הארץ מביאים זהב וכסף לשלמה
דברי הימים ב 9 : 15 (ALEP)
טו ויעש המלך שלמה מאתים צנה זהב שחוט שש מאות זהב שחוט יעלה על הצנה האחת
דברי הימים ב 9 : 16 (ALEP)
טז ושלש מאות מגנים זהב שחוט--שלש מאות זהב יעלה על המגן האחת ויתנם המלך בבית יער הלבנון
דברי הימים ב 9 : 17 (ALEP)
יז ויעש המלך כסא שן גדול ויצפהו זהב טהור
דברי הימים ב 9 : 18 (ALEP)
יח ושש מעלות לכסא וכבש בזהב לכסא מאחזים וידות מזה ומזה על מקום השבת ושנים אריות עמדים אצל הידות
דברי הימים ב 9 : 19 (ALEP)
יט ושנים עשר אריות עמדים שם על שש המעלות--מזה ומזה לא נעשה כן לכל ממלכה
דברי הימים ב 9 : 20 (ALEP)
כ וכל כלי משקה המלך שלמה זהב וכל כלי בית יער הלבנון זהב סגור אין כסף נחשב בימי שלמה--למאומה
דברי הימים ב 9 : 21 (ALEP)
כא כי אניות למלך הלכות תרשיש עם עבדי חורם אחת לשלוש שנים תבואנה אניות תרשיש נשאות זהב וכסף שנהבים וקופים ותוכיים פ
דברי הימים ב 9 : 22 (ALEP)
כב ויגדל המלך שלמה מכל מלכי הארץ--לעשר וחכמה
דברי הימים ב 9 : 23 (ALEP)
כג וכל מלכי הארץ מבקשים את פני שלמה--לשמע את חכמתו אשר נתן האלהים בלבו
דברי הימים ב 9 : 24 (ALEP)
כד והם מביאים איש מנחתו כלי כסף וכלי זהב ושלמות נשק ובשמים סוסים ופרדים--דבר שנה בשנה ס
דברי הימים ב 9 : 25 (ALEP)
כה ויהי לשלמה ארבעת אלפים אריות סוסים ומרכבות ושנים עשר אלף פרשים ויניחם בערי הרכב ועם המלך בירושלם
דברי הימים ב 9 : 26 (ALEP)
כו ויהי מושל בכל המלכים--מן הנהר ועד ארץ פלשתים ועד גבול מצרים
דברי הימים ב 9 : 27 (ALEP)
כז ויתן המלך את הכסף בירושלם כאבנים ואת הארזים נתן כשקמים אשר בשפלה--לרב
דברי הימים ב 9 : 28 (ALEP)
כח ומוציאים סוסים ממצרים לשלמה ומכל הארצות
דברי הימים ב 9 : 29 (ALEP)
כט ושאר דברי שלמה הראשנים והאחרונים--הלא הם כתובים על דברי נתן הנביא ועל נבואת אחיה השילוני ובחזות יעדי (יעדו) החזה על ירבעם בן נבט
דברי הימים ב 9 : 30 (ALEP)
ל וימלך שלמה בירושלם על כל ישראל ארבעים שנה
דברי הימים ב 9 : 31 (ALEP)
לא וישכב שלמה עם אבתיו ויקברהו בעיר דויד אביו וימלך רחבעם בנו תחתיו פ
❮
❯