דברי הימים ב 5 : 1 (ALEP)
א ותשלם כל המלאכה אשר עשה שלמה לבית יהוה ס ויבא שלמה את קדשי דויד אביו ואת הכסף ואת הזהב ואת כל הכלים--נתן באצרות בית האלהים פ
דברי הימים ב 5 : 2 (ALEP)
ב אז יקהיל שלמה את זקני ישראל ואת כל ראשי המטות נשיאי האבות לבני ישראל--אל ירושלם להעלות את ארון ברית יהוה מעיר דויד--היא ציון
דברי הימים ב 5 : 3 (ALEP)
ג ויקהלו אל המלך כל איש ישראל בחג הוא החדש השבעי
דברי הימים ב 5 : 4 (ALEP)
ד ויבאו כל זקני ישראל וישאו הלוים את הארון
דברי הימים ב 5 : 5 (ALEP)
ה ויעלו את הארון ואת אהל מועד ואת כל כלי הקדש אשר באהל העלו אתם הכהנים הלוים
דברי הימים ב 5 : 6 (ALEP)
ו והמלך שלמה וכל עדת ישראל הנועדים עליו--לפני הארון מזבחים צאן ובקר אשר לא יספרו ולא ימנו מרב
דברי הימים ב 5 : 7 (ALEP)
ז ויביאו הכהנים את ארון ברית יהוה אל מקומו אל דביר הבית--אל קדש הקדשים אל תחת כנפי הכרובים
דברי הימים ב 5 : 8 (ALEP)
ח ויהיו הכרובים פרשים כנפים על מקום הארון ויכסו הכרובים על הארון ועל בדיו מלמעלה
דברי הימים ב 5 : 9 (ALEP)
ט ויאריכו הבדים ויראו ראשי הבדים מן הארון על פני הדביר ולא יראו החוצה ויהי שם עד היום הזה
דברי הימים ב 5 : 10 (ALEP)
י אין בארון--רק שני הלחות אשר נתן משה בחרב אשר כרת יהוה עם בני ישראל בצאתם ממצרים פ
דברי הימים ב 5 : 11 (ALEP)
יא ויהי בצאת הכהנים מן הקדש כי כל הכהנים הנמצאים התקדשו--אין לשמור למחלקות
דברי הימים ב 5 : 12 (ALEP)
יב והלוים המשררים לכלם לאסף להימן לידתון ולבניהם ולאחיהם מלבשים בוץ במצלתים ובנבלים וכנרות עמדים מזרח למזבח ועמהם כהנים למאה ועשרים מחצררים (מחצרים) בחצצרות
דברי הימים ב 5 : 13 (ALEP)
יג ויהי כאחד למחצצרים (למחצרים) ולמשררים להשמיע קול אחד להלל ולהדות ליהוה וכהרים קול בחצצרות ובמצלתים ובכלי השיר ובהלל ליהוה כי טוב כי לעולם חסדו והבית מלא ענן בית יהוה
דברי הימים ב 5 : 14 (ALEP)
יד ולא יכלו הכהנים לעמוד לשרת מפני הענן כי מלא כבוד יהוה את בית האלהים פ
❮
❯