2 Chronicles 35 : 1 (ALEP)
א ויעש יאשיהו בירושלם פסח ליהוה וישחטו הפסח בארבעה עשר לחדש הראשון
2 Chronicles 35 : 2 (ALEP)
ב ויעמד הכהנים על משמרותם ויחזקם לעבודת בית יהוה {ס}
2 Chronicles 35 : 3 (ALEP)
ג ויאמר ללוים המבונים (המבינים) לכל ישראל הקדושים ליהוה תנו את ארון הקדש בבית אשר בנה שלמה בן דויד מלך ישראל--אין לכם משא בכתף עתה עבדו את יהוה אלהיכם ואת עמו ישראל
2 Chronicles 35 : 4 (ALEP)
ד והכונו (והכינו) לבית אבותיכם כמחלקותיכם--בכתב דויד מלך ישראל ובמכתב שלמה בנו
2 Chronicles 35 : 5 (ALEP)
ה ועמדו בקדש לפלוגת בית האבות לאחיכם בני העם--וחלקת בית אב ללוים
2 Chronicles 35 : 6 (ALEP)
ו ושחטו הפסח והתקדשו והכינו לאחיכם לעשות כדבר יהוה ביד משה {פ}
2 Chronicles 35 : 7 (ALEP)
ז וירם יאשיהו לבני העם צאן כבשים ובני עזים הכל לפסחים לכל הנמצא למספר שלשים אלף ובקר שלשת אלפים אלה מרכוש המלך {ס}
2 Chronicles 35 : 8 (ALEP)
ח ושריו לנדבה לעם לכהנים וללוים--הרימו חלקיה וזכריהו ויחיאל נגידי בית האלהים לכהנים נתנו לפסחים אלפים ושש מאות ובקר שלש מאות
2 Chronicles 35 : 9 (ALEP)
ט וכונניהו (וכנניהו) ושמעיהו ונתנאל אחיו וחשביהו ויעיאל ויוזבד--שרי הלוים הרימו ללוים לפסחים חמשת אלפים ובקר חמש מאות
2 Chronicles 35 : 10 (ALEP)
י ותכון העבודה ויעמדו הכהנים על עמדם והלוים על מחלקותם כמצות המלך
2 Chronicles 35 : 11 (ALEP)
יא וישחטו הפסח ויזרקו הכהנים מידם והלוים מפשיטים
2 Chronicles 35 : 12 (ALEP)
יב ויסירו העלה לתתם למפלגות לבית אבות לבני העם להקריב ליהוה ככתוב בספר משה וכן לבקר
2 Chronicles 35 : 13 (ALEP)
יג ויבשלו הפסח באש כמשפט והקדשים בשלו בסירות ובדודים ובצלחות ויריצו לכל בני העם
2 Chronicles 35 : 14 (ALEP)
יד ואחר הכינו להם ולכהנים--כי הכהנים בני אהרן בהעלות העולה והחלבים עד לילה והלוים הכינו להם ולכהנים בני אהרן
2 Chronicles 35 : 15 (ALEP)
טו והמשררים בני אסף על מעמדם כמצות דויד ואסף והימן וידתון חוזה המלך והשערים לשער ושער אין להם לסור מעל עבדתם--כי אחיהם הלוים הכינו להם
2 Chronicles 35 : 16 (ALEP)
טז ותכון כל עבודת יהוה ביום ההוא לעשות הפסח והעלות עלות על מזבח יהוה--כמצות המלך יאשיהו
2 Chronicles 35 : 17 (ALEP)
יז ויעשו בני ישראל הנמצאים את הפסח בעת ההיא ואת חג המצות שבעת ימים
2 Chronicles 35 : 18 (ALEP)
יח ולא נעשה פסח כמהו בישראל מימי שמואל הנביא וכל מלכי ישראל לא עשו כפסח אשר עשה יאשיהו והכהנים והלוים וכל יהודה וישראל הנמצא ויושבי ירושלם {ס}
2 Chronicles 35 : 19 (ALEP)
יט בשמונה עשרה שנה למלכות יאשיהו--נעשה הפסח הזה
2 Chronicles 35 : 20 (ALEP)
כ אחרי כל זאת אשר הכין יאשיהו את הבית עלה נכו מלך מצרים להלחם בכרכמיש על פרת ויצא לקראתו יאשיהו
2 Chronicles 35 : 21 (ALEP)
כא וישלח אליו מלאכים לאמר מה לי ולך מלך יהודה לא עליך אתה היום כי אל בית מלחמתי ואלהים אמר לבהלני חדל לך מאלהים אשר עמי ואל ישחיתך
2 Chronicles 35 : 22 (ALEP)
כב ולא הסב יאשיהו פניו ממנו כי להלחם בו התחפש ולא שמע אל דברי נכו מפי אלהים ויבא להלחם בבקעת מגדו
2 Chronicles 35 : 23 (ALEP)
כג וירו הירים למלך יאשיהו ויאמר המלך לעבדיו העבירוני כי החליתי מאד
2 Chronicles 35 : 24 (ALEP)
כד ויעבירהו עבדיו מן המרכבה וירכיבהו על רכב המשנה אשר לו ויוליכהו ירושלם וימת ויקבר בקברות אבתיו וכל יהודה וירושלם מתאבלים על יאשיהו {פ}
2 Chronicles 35 : 25 (ALEP)
כה ויקונן ירמיהו על יאשיהו ויאמרו כל השרים והשרות בקינותיהם על יאשיהו עד היום ויתנום לחק על ישראל והנם כתובים על הקינות
2 Chronicles 35 : 26 (ALEP)
כו ויתר דברי יאשיהו וחסדיו--ככתוב בתורת יהוה
2 Chronicles 35 : 27 (ALEP)
כז ודבריו הראשנים והאחרנים--הנם כתובים על ספר מלכי ישראל ויהודה
❮
❯