דברי הימים ב 31 : 1 (ALEP)
א וככלות כל זאת יצאו כל ישראל הנמצאים לערי יהודה וישברו המצבות ויגדעו האשרים וינתצו את הבמות ואת המזבחות מכל יהודה ובנימן ובאפרים ומנשה עד לכלה וישובו כל בני ישראל איש לאחזתו--לעריהם פ
דברי הימים ב 31 : 2 (ALEP)
ב ויעמד יחזקיהו את מחלקות הכהנים והלוים על מחלקותם איש כפי עבדתו לכהנים וללוים לעלה ולשלמים--לשרת ולהדות ולהלל בשערי מחנות יהוה ס
דברי הימים ב 31 : 3 (ALEP)
ג ומנת המלך מן רכושו לעלות לעלות הבקר והערב והעלות לשבתות ולחדשים ולמעדים--ככתוב בתורת יהוה
דברי הימים ב 31 : 4 (ALEP)
ד ויאמר לעם ליושבי ירושלם לתת מנת הכהנים והלוים--למען יחזקו בתורת יהוה
דברי הימים ב 31 : 5 (ALEP)
ה וכפרץ הדבר הרבו בני ישראל ראשית דגן תירוש ויצהר ודבש וכל תבואת שדה ומעשר הכל לרב הביאו
דברי הימים ב 31 : 6 (ALEP)
ו ובני ישראל ויהודה היושבים בערי יהודה--גם הם מעשר בקר וצאן ומעשר קדשים המקדשים ליהוה אלהיהם הביאו ויתנו ערמות ערמות ס
דברי הימים ב 31 : 7 (ALEP)
ז בחדש השלשי החלו הערמות ליסוד ובחדש השביעי כלו ס
דברי הימים ב 31 : 8 (ALEP)
ח ויבאו יחזקיהו והשרים ויראו את הערמות ויברכו את יהוה ואת עמו ישראל פ
דברי הימים ב 31 : 9 (ALEP)
ט וידרש יחזקיהו על הכהנים והלוים--על הערמות
דברי הימים ב 31 : 10 (ALEP)
י ויאמר אליו עזריהו הכהן הראש--לבית צדוק ויאמר מהחל התרומה לביא בית יהוה אכול ושבוע והותר עד לרוב--כי יהוה ברך את עמו והנותר את ההמון הזה ס
דברי הימים ב 31 : 11 (ALEP)
יא ויאמר יחזקיהו להכין לשכות בבית יהוה--ויכינו
דברי הימים ב 31 : 12 (ALEP)
יב ויביאו את התרומה והמעשר והקדשים באמונה ועליהם נגיד כונניהו (כנניהו) הלוי ושמעי אחיהו משנה
דברי הימים ב 31 : 13 (ALEP)
יג ויחיאל ועזזיהו ונחת ועשהאל וירימות ויוזבד ואליאל ויסמכיהו ומחת ובניהו--פקידים מיד כונניהו (כנניהו) ושמעי אחיו במפקד יחזקיהו המלך ועזריהו נגיד בית האלהים
דברי הימים ב 31 : 14 (ALEP)
יד וקורא בן ימנה הלוי השוער למזרחה על נדבות האלהים--לתת תרומת יהוה וקדשי הקדשים
דברי הימים ב 31 : 15 (ALEP)
טו ועל ידו עדן ומנימן וישוע ושמעיהו אמריהו ושכניהו בערי הכהנים--באמונה לתת לאחיהם במחלקות כגדול כקטן
דברי הימים ב 31 : 16 (ALEP)
טז מלבד התיחשם לזכרים מבן שלוש שנים ולמעלה לכל הבא לבית יהוה לדבר יום ביומו--לעבודתם במשמרותם כמחלקותיהם
דברי הימים ב 31 : 17 (ALEP)
יז ואת התיחש הכהנים לבית אבותיהם והלוים מבן עשרים שנה ולמעלה--במשמרותיהם במחלקותיהם
דברי הימים ב 31 : 18 (ALEP)
יח ולהתיחש בכל טפם נשיהם ובניהם ובנותיהם--לכל קהל כי באמונתם יתקדשו קדש
דברי הימים ב 31 : 19 (ALEP)
יט ולבני אהרן הכהנים בשדי מגרש עריהם בכל עיר ועיר אנשים אשר נקבו בשמות--לתת מנות לכל זכר בכהנים ולכל התיחש בלוים
דברי הימים ב 31 : 20 (ALEP)
כ ויעש כזאת יחזקיהו בכל יהודה ויעש הטוב והישר והאמת לפני יהוה אלהיו
דברי הימים ב 31 : 21 (ALEP)
כא ובכל מעשה אשר החל בעבודת בית האלהים ובתורה ובמצוה לדרש לאלהיו--בכל לבבו עשה והצליח פ
❮
❯