דברי הימים ב 26 : 1 (ALEP)
א ויקחו כל עם יהודה את עזיהו והוא בן שש עשרה שנה וימליכו אתו תחת אביו אמציהו
דברי הימים ב 26 : 2 (ALEP)
ב הוא בנה את אילות וישיבה ליהודה אחרי שכב המלך עם אבתיו פ
דברי הימים ב 26 : 3 (ALEP)
ג בן שש עשרה שנה עזיהו במלכו וחמשים ושתים שנה מלך בירושלם ושם אמו יכיליה (יכליה) מן ירושלם
דברי הימים ב 26 : 4 (ALEP)
ד ויעש הישר בעיני יהוה ככל אשר עשה אמציהו אביו
דברי הימים ב 26 : 5 (ALEP)
ה ויהי לדרש אלהים בימי זכריהו המבין בראת האלהים ובימי דרשו את יהוה הצליחו האלהים
דברי הימים ב 26 : 6 (ALEP)
ו ויצא וילחם בפלשתים ויפרץ את חומת גת ואת חומת יבנה ואת חומת אשדוד ויבנה ערים באשדוד ובפלשתים
דברי הימים ב 26 : 7 (ALEP)
ז ויעזרהו האלהים על פלשתים ועל הערביים (הערבים) הישבים בגור בעל--והמעונים
דברי הימים ב 26 : 8 (ALEP)
ח ויתנו העמונים מנחה לעזיהו וילך שמו עד לבוא מצרים כי החזיק עד למעלה
דברי הימים ב 26 : 9 (ALEP)
ט ויבן עזיהו מגדלים בירושלם על שער הפנה ועל שער הגיא ועל המקצוע ויחזקם
דברי הימים ב 26 : 10 (ALEP)
י ויבן מגדלים במדבר ויחצב ברות רבים--כי מקנה רב היה לו ובשפלה ובמישור אכרים וכרמים בהרים ובכרמל--כי אהב אדמה היה ס
דברי הימים ב 26 : 11 (ALEP)
יא ויהי לעזיהו חיל עשה מלחמה יוצאי צבא לגדוד במספר פקדתם ביד יעואל (יעיאל) הסופר ומעשיהו השוטר--על יד חנניהו משרי המלך
דברי הימים ב 26 : 12 (ALEP)
יב כל מספר ראשי האבות לגבורי חיל--אלפים ושש מאות
דברי הימים ב 26 : 13 (ALEP)
יג ועל ידם חיל צבא שלש מאות אלף ושבעת אלפים וחמש מאות עושי מלחמה בכח חיל--לעזר למלך על האויב
דברי הימים ב 26 : 14 (ALEP)
יד ויכן להם עזיהו לכל הצבא מגנים ורמחים וכובעים ושרינות וקשתות--ולאבני קלעים
דברי הימים ב 26 : 15 (ALEP)
טו ויעש בירושלם חשבנות מחשבת חושב להיות על המגדלים ועל הפנות לירוא בחצים ובאבנים גדלות ויצא שמו עד למרחוק כי הפליא להעזר עד כי חזק
דברי הימים ב 26 : 16 (ALEP)
טז וכחזקתו גבה לבו עד להשחית וימעל ביהוה אלהיו ויבא אל היכל יהוה להקטיר על מזבח הקטרת
דברי הימים ב 26 : 17 (ALEP)
יז ויבא אחריו עזריהו הכהן ועמו כהנים ליהוה שמונים--בני חיל
דברי הימים ב 26 : 18 (ALEP)
יח ויעמדו על עזיהו המלך ויאמרו לו לא לך עזיהו להקטיר ליהוה--כי לכהנים בני אהרן המקדשים להקטיר צא מן המקדש כי מעלת ולא לך לכבוד מיהוה אלהים
דברי הימים ב 26 : 19 (ALEP)
יט ויזעף עזיהו ובידו מקטרת להקטיר ובזעפו עם הכהנים והצרעת זרחה במצחו לפני הכהנים בבית יהוה מעל למזבח הקטרת
דברי הימים ב 26 : 20 (ALEP)
כ ויפן אליו עזריהו כהן הראש וכל הכהנים והנה הוא מצרע במצחו ויבהלוהו משם וגם הוא נדחף לצאת כי נגעו יהוה
דברי הימים ב 26 : 21 (ALEP)
כא ויהי עזיהו המלך מצרע עד יום מותו וישב בית החפשות (החפשית) מצרע--כי נגזר מבית יהוה ויותם בנו על בית המלך שופט את עם הארץ
דברי הימים ב 26 : 22 (ALEP)
כב ויתר דברי עזיהו הראשנים והאחרנים--כתב ישעיהו בן אמוץ הנביא
דברי הימים ב 26 : 23 (ALEP)
כג וישכב עזיהו עם אבתיו ויקברו אתו עם אבתיו בשדה הקבורה אשר למלכים--כי אמרו מצורע הוא וימלך יותם בנו תחתיו פ
❮
❯