דברי הימים ב 23 : 1 (ALEP)
א ובשנה השבעית התחזק יהוידע ויקח את שרי המאות לעזריהו בן ירחם ולישמעאל בן יהוחנן ולעזריהו בן עובד ואת מעשיהו בן עדיהו ואת אלישפט בן זכרי--עמו בברית
דברי הימים ב 23 : 2 (ALEP)
ב ויסבו ביהודה ויקבצו את הלוים מכל ערי יהודה וראשי האבות לישראל ויבאו אל ירושלם
דברי הימים ב 23 : 3 (ALEP)
ג ויכרת כל הקהל ברית בבית האלהים עם המלך ויאמר להם הנה בן המלך ימלך כאשר דבר יהוה על בני דויד
דברי הימים ב 23 : 4 (ALEP)
ד זה הדבר אשר תעשו השלשית מכם באי השבת לכהנים וללוים לשערי הספים
דברי הימים ב 23 : 5 (ALEP)
ה והשלשית בבית המלך והשלשית בשער היסוד וכל העם--בחצרות בית יהוה
דברי הימים ב 23 : 6 (ALEP)
ו ואל יבוא בית יהוה כי אם הכהנים והמשרתים ללוים--המה יבאו כי קדש המה וכל העם--ישמרו משמרת יהוה
דברי הימים ב 23 : 7 (ALEP)
ז והקיפו הלוים את המלך סביב איש וכליו בידו והבא אל הבית יומת והיו את המלך בבאו ובצאתו
דברי הימים ב 23 : 8 (ALEP)
ח ויעשו הלוים וכל יהודה ככל אשר צוה יהוידע הכהן ויקחו איש את אנשיו באי השבת עם יוצאי השבת כי לא פטר יהוידע הכהן את המחלקות
דברי הימים ב 23 : 9 (ALEP)
ט ויתן יהוידע הכהן לשרי המאות את החניתים ואת המגנות ואת השלטים אשר למלך דויד--אשר בית האלהים
דברי הימים ב 23 : 10 (ALEP)
י ויעמד את כל העם ואיש שלחו בידו מכתף הבית הימנית עד כתף הבית השמאלית למזבח ולבית--על המלך סביב
דברי הימים ב 23 : 11 (ALEP)
יא ויוציאו את בן המלך ויתנו עליו את הנזר ואת העדות וימליכו אתו וימשחהו יהוידע ובניו ויאמרו יחי המלך ס
דברי הימים ב 23 : 12 (ALEP)
יב ותשמע עתליהו את קול העם הרצים והמהללים את המלך ותבוא אל העם בית יהוה
דברי הימים ב 23 : 13 (ALEP)
יג ותרא והנה המלך עומד על עמודו במבוא והשרים והחצצרות על המלך וכל עם הארץ שמח ותוקע בחצצרות והמשוררים בכלי השיר ומודיעים להלל ותקרע עתליהו את בגדיה ותאמר קשר קשר ס
דברי הימים ב 23 : 14 (ALEP)
יד ויוצא יהוידע הכהן את שרי המאות פקודי החיל ויאמר אלהם הוציאוה אל מבית השדרות והבא אחריה יומת בחרב כי אמר הכהן לא תמיתוה בית יהוה
דברי הימים ב 23 : 15 (ALEP)
טו וישימו לה ידים ותבוא אל מבוא שער הסוסים בית המלך וימיתוה שם פ
דברי הימים ב 23 : 16 (ALEP)
טז ויכרת יהוידע ברית--בינו ובין כל העם ובין המלך להיות לעם ליהוה
דברי הימים ב 23 : 17 (ALEP)
יז ויבאו כל העם בית הבעל ויתצהו ואת מזבחתיו ואת צלמיו שברו ואת מתן כהן הבעל הרגו לפני המזבחות
דברי הימים ב 23 : 18 (ALEP)
יח וישם יהוידע פקדות בית יהוה ביד הכהנים הלוים אשר חלק דויד על בית יהוה להעלות עלות יהוה ככתוב בתורת משה בשמחה ובשיר--על ידי דויד
דברי הימים ב 23 : 19 (ALEP)
יט ויעמד השוערים על שערי בית יהוה ולא יבוא טמא לכל דבר
דברי הימים ב 23 : 20 (ALEP)
כ ויקח את שרי המאות ואת האדירים ואת המושלים בעם ואת כל עם הארץ ויורד את המלך מבית יהוה ויבאו בתוך שער העליון בית המלך ויושיבו את המלך על כסא הממלכה
דברי הימים ב 23 : 21 (ALEP)
כא וישמחו כל עם הארץ והעיר שקטה ואת עתליהו המיתו בחרב
❮
❯