דברי הימים ב 20 : 1 (ALEP)
א ויהי אחרי כן באו בני מואב ובני עמון ועמהם מהעמונים על יהושפט--למלחמה
דברי הימים ב 20 : 2 (ALEP)
ב ויבאו ויגידו ליהושפט לאמר בא עליך המון רב מעבר לים מארם והנם בחצצון תמר היא עין גדי
דברי הימים ב 20 : 3 (ALEP)
ג וירא ויתן יהושפט את פניו לדרוש ליהוה ויקרא צום על כל יהודה
דברי הימים ב 20 : 4 (ALEP)
ד ויקבצו יהודה לבקש מיהוה גם מכל ערי יהודה באו לבקש את יהוה
דברי הימים ב 20 : 5 (ALEP)
ה ויעמד יהושפט בקהל יהודה וירושלם--בבית יהוה לפני החצר החדשה
דברי הימים ב 20 : 6 (ALEP)
ו ויאמר יהוה אלהי אבתינו הלא אתה הוא אלהים בשמים ואתה מושל בכל ממלכות הגוים ובידך כח וגבורה ואין עמך להתיצב
דברי הימים ב 20 : 7 (ALEP)
ז הלא אתה אלהינו הורשת את ישבי הארץ הזאת מלפני עמך ישראל ותתנה לזרע אברהם אהבך--לעולם
דברי הימים ב 20 : 8 (ALEP)
ח וישבו בה ויבנו לך בה מקדש לשמך לאמר
דברי הימים ב 20 : 9 (ALEP)
ט אם תבוא עלינו רעה חרב שפוט ודבר ורעב נעמדה לפני הבית הזה ולפניך כי שמך בבית הזה ונזעק אליך מצרתנו ותשמע ותושיע
דברי הימים ב 20 : 10 (ALEP)
י ועתה הנה בני עמון ומואב והר שעיר אשר לא נתתה לישראל לבוא בהם בבאם מארץ מצרים כי סרו מעליהם ולא השמידום
דברי הימים ב 20 : 11 (ALEP)
יא והנה הם--גמלים עלינו לבוא לגרשנו מירשתך אשר הורשתנו
דברי הימים ב 20 : 12 (ALEP)
יב אלהינו הלא תשפט בם כי אין בנו כח לפני ההמון הרב הזה הבא עלינו ואנחנו לא נדע מה נעשה--כי עליך עינינו
דברי הימים ב 20 : 13 (ALEP)
יג וכל יהודה--עמדים לפני יהוה גם טפם נשיהם ובניהם ס
דברי הימים ב 20 : 14 (ALEP)
יד ויחזיאל בן זכריהו בן בניה בן יעיאל בן מתניה הלוי--מן בני אסף היתה עליו רוח יהוה בתוך הקהל
דברי הימים ב 20 : 15 (ALEP)
טו ויאמר הקשיבו כל יהודה וישבי ירושלם והמלך יהושפט כה אמר יהוה לכם אתם אל תיראו ואל תחתו מפני ההמון הרב הזה--כי לא לכם המלחמה כי לאלהים
דברי הימים ב 20 : 16 (ALEP)
טז מחר רדו עליהם הנם עלים במעלה הציץ ומצאתם אתם בסוף הנחל פני מדבר ירואל
דברי הימים ב 20 : 17 (ALEP)
יז לא לכם להלחם בזאת התיצבו עמדו וראו את ישועת יהוה עמכם יהודה וירושלם אל תיראו ואל תחתו--מחר צאו לפניהם ויהוה עמכם
דברי הימים ב 20 : 18 (ALEP)
יח ויקד יהושפט אפים ארצה וכל יהודה וישבי ירושלם נפלו לפני יהוה להשתחות ליהוה
דברי הימים ב 20 : 19 (ALEP)
יט ויקמו הלוים מן בני הקהתים ומן בני הקרחים--להלל ליהוה אלהי ישראל בקול גדול למעלה
דברי הימים ב 20 : 20 (ALEP)
כ וישכימו בבקר ויצאו למדבר תקוע ובצאתם עמד יהושפט ויאמר שמעוני יהודה וישבי ירושלם--האמינו ביהוה אלהיכם ותאמנו האמינו בנביאיו והצליחו
דברי הימים ב 20 : 21 (ALEP)
כא ויועץ אל העם ויעמד משררים ליהוה ומהללים להדרת קדש--בצאת לפני החלוץ ואמרים הודו ליהוה כי לעולם חסדו
דברי הימים ב 20 : 22 (ALEP)
כב ובעת החלו ברנה ותהלה נתן יהוה מארבים על בני עמון מואב והר שעיר הבאים ליהודה--וינגפו
דברי הימים ב 20 : 23 (ALEP)
כג ויעמדו בני עמון ומואב על ישבי הר שעיר--להחרים ולהשמיד וככלותם ביושבי שעיר עזרו איש ברעהו למשחית
דברי הימים ב 20 : 24 (ALEP)
כד ויהודה בא על המצפה למדבר ויפנו אל ההמון והנם פגרים נפלים ארצה ואין פליטה
דברי הימים ב 20 : 25 (ALEP)
כה ויבא יהושפט ועמו לבז את שללם וימצאו בהם לרב ורכוש ופגרים וכלי חמדות וינצלו להם לאין משא ויהיו ימים שלושה בזזים את השלל--כי רב הוא
דברי הימים ב 20 : 26 (ALEP)
כו וביום הרבעי נקהלו לעמק ברכה--כי שם ברכו את יהוה על כן קראו את שם המקום ההוא עמק ברכה--עד היום
דברי הימים ב 20 : 27 (ALEP)
כז וישבו כל איש יהודה וירושלם ויהושפט בראשם לשוב אל ירושלם בשמחה כי שמחם יהוה מאויביהם
דברי הימים ב 20 : 28 (ALEP)
כח ויבאו ירושלם בנבלים ובכנרות ובחצצרות--אל בית יהוה
דברי הימים ב 20 : 29 (ALEP)
כט ויהי פחד אלהים על כל ממלכות הארצות בשמעם--כי נלחם יהוה עם אויבי ישראל
דברי הימים ב 20 : 30 (ALEP)
ל ותשקט מלכות יהושפט וינח לו אלהיו מסביב פ
דברי הימים ב 20 : 31 (ALEP)
לא וימלך יהושפט על יהודה--בן שלשים וחמש שנה במלכו ועשרים וחמש שנה מלך בירושלם ושם אמו עזובה בת שלחי
דברי הימים ב 20 : 32 (ALEP)
לב וילך בדרך אביו אסא--ולא סר ממנה לעשות הישר בעיני יהוה
דברי הימים ב 20 : 33 (ALEP)
לג אך הבמות לא סרו ועוד העם לא הכינו לבבם לאלהי אבתיהם
דברי הימים ב 20 : 34 (ALEP)
לד ויתר דברי יהושפט הראשנים והאחרנים--הנם כתובים בדברי יהוא בן חנני אשר העלה על ספר מלכי ישראל
דברי הימים ב 20 : 35 (ALEP)
לה ואחרי כן אתחבר יהושפט מלך יהודה עם אחזיה מלך ישראל הוא הרשיע לעשות
דברי הימים ב 20 : 36 (ALEP)
לו ויחברהו עמו לעשות אניות ללכת תרשיש ויעשו אניות בעציון גבר
דברי הימים ב 20 : 37 (ALEP)
לז ויתנבא אליעזר בן דדוהו ממרשה על יהושפט לאמר כהתחברך עם אחזיהו פרץ יהוה את מעשיך וישברו אניות ולא עצרו ללכת אל תרשיש
❮
❯