דברי הימים ב 2 : 1 (ALEP)
א ויספר שלמה שבעים אלף איש סבל ושמונים אלף איש חצב בהר ומנצחים עליהם שלשת אלפים ושש מאות פ
דברי הימים ב 2 : 2 (ALEP)
ב וישלח שלמה אל חורם מלך צר לאמר כאשר עשית עם דויד אבי ותשלח לו ארזים לבנות לו בית לשבת בו
דברי הימים ב 2 : 3 (ALEP)
ג הנה אני בונה בית לשם יהוה אלהי להקדיש לו להקטיר לפניו קטרת סמים ומערכת תמיד ועלות לבקר ולערב לשבתות ולחדשים ולמועדי יהוה אלהינו לעולם זאת על ישראל
דברי הימים ב 2 : 4 (ALEP)
ד והבית אשר אני בונה גדול כי גדול אלהינו מכל האלהים
דברי הימים ב 2 : 5 (ALEP)
ה ומי יעצר כח לבנות לו בית כי השמים ושמי השמים לא יכלכלהו ומי אני אשר אבנה לו בית כי אם להקטיר לפניו
דברי הימים ב 2 : 6 (ALEP)
ו ועתה שלח לי איש חכם לעשות בזהב ובכסף ובנחשת ובברזל ובארגון וכרמיל ותכלת וידע לפתח פתוחים עם החכמים אשר עמי ביהודה ובירושלם אשר הכין דויד אבי
דברי הימים ב 2 : 7 (ALEP)
ז ושלח לי עצי ארזים ברושים ואלגומים מהלבנון--כי אני ידעתי אשר עבדיך יודעים לכרות עצי לבנון והנה עבדי עם עבדיך
דברי הימים ב 2 : 8 (ALEP)
ח ולהכין לי עצים לרב כי הבית אשר אני בונה גדול והפלא
דברי הימים ב 2 : 9 (ALEP)
ט והנה לחטבים לכרתי העצים נתתי חטים מכות לעבדיך כרים עשרים אלף ושערים כרים עשרים אלף ויין בתים עשרים אלף ושמן בתים עשרים אלף ס
דברי הימים ב 2 : 10 (ALEP)
י ויאמר חורם מלך צר בכתב וישלח אל שלמה באהבת יהוה את עמו נתנך עליהם מלך
דברי הימים ב 2 : 11 (ALEP)
יא ויאמר חורם--ברוך יהוה אלהי ישראל אשר עשה את השמים ואת הארץ אשר נתן לדויד המלך בן חכם יודע שכל ובינה אשר יבנה בית ליהוה ובית למלכותו
דברי הימים ב 2 : 12 (ALEP)
יב ועתה שלחתי איש חכם יודע בינה--לחורם אבי
דברי הימים ב 2 : 13 (ALEP)
יג בן אשה מן בנות דן ואביו איש צרי יודע לעשות בזהב ובכסף בנחשת בברזל באבנים ובעצים בארגמן בתכלת ובבוץ ובכרמיל ולפתח כל פתוח ולחשב כל מחשבת--אשר ינתן לו עם חכמיך וחכמי אדני דויד אביך
דברי הימים ב 2 : 14 (ALEP)
יד ועתה החטים והשערים השמן והיין אשר אמר אדני--ישלח לעבדיו
דברי הימים ב 2 : 15 (ALEP)
טו ואנחנו נכרת עצים מן הלבנון ככל צרכך ונביאם לך רפסדות על ים יפו ואתה תעלה אתם ירושלם פ
דברי הימים ב 2 : 16 (ALEP)
טז ויספר שלמה כל האנשים הגירים אשר בארץ ישראל אחרי הספר אשר ספרם דויד אביו וימצאו מאה וחמשים אלף ושלשת אלפים ושש מאות
דברי הימים ב 2 : 17 (ALEP)
יז ויעש מהם שבעים אלף סבל ושמנים אלף חצב בהר ושלשת אלפים ושש מאות מנצחים להעביד את העם
❮
❯