דברי הימים ב 16 : 1 (ALEP)
א בשנת שלשים ושש למלכות אסא עלה בעשא מלך ישראל על יהודה ויבן את הרמה--לבלתי תת יוצא ובא לאסא מלך יהודה
דברי הימים ב 16 : 2 (ALEP)
ב ויצא אסא כסף וזהב מאצרות בית יהוה--ובית המלך וישלח אל בן הדד מלך ארם היושב בדרמשק לאמר
דברי הימים ב 16 : 3 (ALEP)
ג ברית ביני ובינך ובין אבי ובין אביך הנה שלחתי לך כסף וזהב--לך הפר בריתך את בעשא מלך ישראל ויעלה מעלי
דברי הימים ב 16 : 4 (ALEP)
ד וישמע בן הדד אל המלך אסא וישלח את שרי החילים אשר לו אל ערי ישראל ויכו את עיון ואת דן ואת אבל מים ואת כל מסכנות ערי נפתלי
דברי הימים ב 16 : 5 (ALEP)
ה ויהי כשמע בעשא ויחדל מבנות את הרמה וישבת את מלאכתו ס
דברי הימים ב 16 : 6 (ALEP)
ו ואסא המלך לקח את כל יהודה וישאו את אבני הרמה ואת עציה אשר בנה בעשא ויבן בהם את גבע ואת המצפה ס
דברי הימים ב 16 : 7 (ALEP)
ז ובעת ההיא בא חנני הראה אל אסא מלך יהודה ויאמר אליו בהשענך על מלך ארם ולא נשענת על יהוה אלהיך על כן נמלט חיל מלך ארם מידך
דברי הימים ב 16 : 8 (ALEP)
ח הלא הכושים והלובים היו לחיל לרב לרכב ולפרשים--להרבה מאד ובהשענך על יהוה נתנם בידך
דברי הימים ב 16 : 9 (ALEP)
ט כי יהוה עיניו משטטות בכל הארץ להתחזק עם לבבם שלם אליו--נסכלת על זאת כי מעתה יש עמך מלחמות
דברי הימים ב 16 : 10 (ALEP)
י ויכעס אסא אל הראה ויתנהו בית המהפכת--כי בזעף עמו על זאת וירצץ אסא מן העם בעת ההיא
דברי הימים ב 16 : 11 (ALEP)
יא והנה דברי אסא הראשונים והאחרונים--הנם כתובים על ספר המלכים ליהודה וישראל
דברי הימים ב 16 : 12 (ALEP)
יב ויחלא אסא בשנת שלושים ותשע למלכותו ברגליו עד למעלה חליו וגם בחליו לא דרש את יהוה כי ברפאים
דברי הימים ב 16 : 13 (ALEP)
יג וישכב אסא עם אבתיו וימת בשנת ארבעים ואחת למלכו
דברי הימים ב 16 : 14 (ALEP)
יד ויקברהו בקברתיו אשר כרה לו בעיר דויד וישכיבהו במשכב אשר מלא בשמים וזנים מרקחים במרקחת מעשה וישרפו לו שרפה גדולה עד למאד פ
❮
❯