דברי הימים ב 15 : 1 (ALEP)
א ועזריהו בן עודד היתה עליו רוח אלהים
דברי הימים ב 15 : 2 (ALEP)
ב ויצא לפני אסא ויאמר לו שמעוני אסא וכל יהודה ובנימן יהוה עמכם בהיותכם עמו ואם תדרשהו ימצא לכם ואם תעזבהו יעזב אתכם {ס}
דברי הימים ב 15 : 3 (ALEP)
ג וימים רבים לישראל ללא אלהי אמת וללא כהן מורה--וללא תורה
דברי הימים ב 15 : 4 (ALEP)
ד וישב בצר לו על יהוה אלהי ישראל ויבקשהו וימצא להם
דברי הימים ב 15 : 5 (ALEP)
ה ובעתים ההם אין שלום ליוצא ולבא כי מהומת רבות על כל ישבי הארצות
דברי הימים ב 15 : 6 (ALEP)
ו וכתתו גוי בגוי ועיר בעיר כי אלהים הממם בכל צרה
דברי הימים ב 15 : 7 (ALEP)
ז ואתם חזקו ואל ירפו ידיכם כי יש שכר לפעלתכם {ס}
דברי הימים ב 15 : 8 (ALEP)
ח וכשמע אסא הדברים האלה והנבואה עדד הנביא התחזק ויעבר השקוצים מכל ארץ יהודה ובנימן ומן הערים אשר לכד מהר אפרים ויחדש את מזבח יהוה אשר לפני אולם יהוה
דברי הימים ב 15 : 9 (ALEP)
ט ויקבץ את כל יהודה ובנימן והגרים עמהם מאפרים ומנשה ומשמעון כי נפלו עליו מישראל לרב בראתם כי יהוה אלהיו עמו {פ}
דברי הימים ב 15 : 10 (ALEP)
י ויקבצו ירושלם בחדש השלשי לשנת חמש עשרה למלכות אסא
דברי הימים ב 15 : 11 (ALEP)
יא ויזבחו ליהוה ביום ההוא מן השלל הביאו בקר שבע מאות וצאן שבעת אלפים
דברי הימים ב 15 : 12 (ALEP)
יב ויבאו בברית--לדרוש את יהוה אלהי אבותיהם בכל לבבם ובכל נפשם
דברי הימים ב 15 : 13 (ALEP)
יג וכל אשר לא ידרש ליהוה אלהי ישראל יומת--למן קטן ועד גדול למאיש ועד אשה
דברי הימים ב 15 : 14 (ALEP)
יד וישבעו ליהוה בקול גדול ובתרועה--ובחצצרות ובשופרות
דברי הימים ב 15 : 15 (ALEP)
טו וישמחו כל יהודה על השבועה כי בכל לבבם נשבעו ובכל רצונם בקשהו וימצא להם וינח יהוה להם מסביב
דברי הימים ב 15 : 16 (ALEP)
טז וגם מעכה אם אסא המלך הסירה מגבירה אשר עשתה לאשרה מפלצת ויכרת אסא את מפלצתה וידק וישרף בנחל קדרון
דברי הימים ב 15 : 17 (ALEP)
יז והבמות--לא סרו מישראל רק לבב אסא היה שלם כל ימיו
דברי הימים ב 15 : 18 (ALEP)
יח ויבא את קדשי אביו וקדשיו--בית האלהים כסף וזהב וכלים
דברי הימים ב 15 : 19 (ALEP)
יט ומלחמה לא היתה עד שנת שלשים וחמש למלכות אסא {פ}
❮
❯