דברי הימים ב 11 : 1 (ALEP)
א ויבא רחבעם ירושלם ויקהל את בית יהודה ובנימן מאה ושמונים אלף בחור עשה מלחמה--להלחם עם ישראל להשיב את הממלכה לרחבעם פ
דברי הימים ב 11 : 2 (ALEP)
ב ויהי דבר יהוה אל שמעיהו איש האלהים לאמר
דברי הימים ב 11 : 3 (ALEP)
ג אמר אל רחבעם בן שלמה מלך יהודה--ואל כל ישראל ביהודה ובנימן לאמר
דברי הימים ב 11 : 4 (ALEP)
ד כה אמר יהוה לא תעלו ולא תלחמו עם אחיכם שובו איש לביתו--כי מאתי נהיה הדבר הזה וישמעו את דברי יהוה וישבו מלכת אל ירבעם פ
דברי הימים ב 11 : 5 (ALEP)
ה וישב רחבעם בירושלם ויבן ערים למצור ביהודה
דברי הימים ב 11 : 6 (ALEP)
ו ויבן את בית לחם ואת עיטם ואת תקוע
דברי הימים ב 11 : 7 (ALEP)
ז ואת בית צור ואת שוכו ואת עדלם
דברי הימים ב 11 : 8 (ALEP)
ח ואת גת ואת מרשה ואת זיף
דברי הימים ב 11 : 9 (ALEP)
ט ואת אדורים ואת לכיש ואת עזקה
דברי הימים ב 11 : 10 (ALEP)
י ואת צרעה ואת אילון ואת חברון אשר ביהודה ובבנימן ערי מצרות
דברי הימים ב 11 : 11 (ALEP)
יא ויחזק את המצורות ויתן בהם נגידים ואצרות מאכל ושמן ויין
דברי הימים ב 11 : 12 (ALEP)
יב ובכל עיר ועיר צנות ורמחים ויחזקם להרבה מאד ויהי לו יהודה ובנימן ס
דברי הימים ב 11 : 13 (ALEP)
יג והכהנים והלוים אשר בכל ישראל--התיצבו עליו מכל גבולם
דברי הימים ב 11 : 14 (ALEP)
יד כי עזבו הלוים את מגרשיהם ואחזתם וילכו ליהודה ולירושלם כי הזניחם ירבעם ובניו מכהן ליהוה
דברי הימים ב 11 : 15 (ALEP)
טו ויעמד לו כהנים לבמות ולשעירים ולעגלים אשר עשה
דברי הימים ב 11 : 16 (ALEP)
טז ואחריהם מכל שבטי ישראל הנתנים את לבבם לבקש את יהוה אלהי ישראל--באו ירושלם לזבוח ליהוה אלהי אבותיהם
דברי הימים ב 11 : 17 (ALEP)
יז ויחזקו את מלכות יהודה ויאמצו את רחבעם בן שלמה לשנים שלוש כי הלכו בדרך דויד ושלמה--לשנים שלוש
דברי הימים ב 11 : 18 (ALEP)
יח ויקח לו רחבעם אשה--את מחלת בן (בת) ירימות בן דויד אביהיל בת אליאב בן ישי
דברי הימים ב 11 : 19 (ALEP)
יט ותלד לו בנים--את יעוש ואת שמריה ואת זהם
דברי הימים ב 11 : 20 (ALEP)
כ ואחריה לקח את מעכה בת אבשלום ותלד לו את אביה ואת עתי ואת זיזא ואת שלמית
דברי הימים ב 11 : 21 (ALEP)
כא ויאהב רחבעם את מעכה בת אבשלום מכל נשיו ופילגשיו--כי נשים שמונה עשרה נשא ופילגשים ששים ויולד עשרים ושמונה בנים--וששים בנות
דברי הימים ב 11 : 22 (ALEP)
כב ויעמד לראש רחבעם את אביה בן מעכה לנגיד באחיו--כי להמליכו
דברי הימים ב 11 : 23 (ALEP)
כג ויבן ויפרץ מכל בניו לכל ארצות יהודה ובנימן לכל ערי המצרות ויתן להם המזון לרב וישאל המון נשים
❮
❯