דברי הימים ב 1 : 1 (ALEP)
א ויתחזק שלמה בן דויד על מלכותו ויהוה אלהיו עמו ויגדלהו למעלה
דברי הימים ב 1 : 2 (ALEP)
ב ויאמר שלמה לכל ישראל לשרי האלפים והמאות ולשפטים ולכל נשיא לכל ישראל--ראשי האבות
דברי הימים ב 1 : 3 (ALEP)
ג וילכו שלמה וכל הקהל עמו לבמה אשר בגבעון כי שם היה אהל מועד האלהים אשר עשה משה עבד יהוה במדבר
דברי הימים ב 1 : 4 (ALEP)
ד אבל ארון האלהים העלה דויד מקרית יערים בהכין לו דויד כי נטה לו אהל בירושלם
דברי הימים ב 1 : 5 (ALEP)
ה ומזבח הנחשת אשר עשה בצלאל בן אורי בן חור--שם לפני משכן יהוה וידרשהו שלמה והקהל
דברי הימים ב 1 : 6 (ALEP)
ו ויעל שלמה שם על מזבח הנחשת לפני יהוה אשר לאהל מועד ויעל עליו עלות אלף
דברי הימים ב 1 : 7 (ALEP)
ז בלילה ההוא נראה אלהים לשלמה ויאמר לו שאל מה אתן לך
דברי הימים ב 1 : 8 (ALEP)
ח ויאמר שלמה לאלהים אתה עשית עם דויד אבי חסד גדול והמלכתני תחתיו
דברי הימים ב 1 : 9 (ALEP)
ט עתה יהוה אלהים--יאמן דברך עם דויד אבי כי אתה המלכתני על עם רב כעפר הארץ
דברי הימים ב 1 : 10 (ALEP)
י עתה חכמה ומדע תן לי ואצאה לפני העם הזה ואבואה כי מי ישפט את עמך הזה הגדול ס
דברי הימים ב 1 : 11 (ALEP)
יא ויאמר אלהים לשלמה יען אשר היתה זאת עם לבבך ולא שאלת עשר נכסים וכבוד ואת נפש שנאיך וגם ימים רבים לא שאלת ותשאל לך חכמה ומדע אשר תשפוט את עמי אשר המלכתיך עליו
דברי הימים ב 1 : 12 (ALEP)
יב החכמה והמדע נתון לך ועשר ונכסים וכבוד אתן לך--אשר לא היה כן למלכים אשר לפניך ואחריך לא יהיה כן
דברי הימים ב 1 : 13 (ALEP)
יג ויבא שלמה לבמה אשר בגבעון ירושלם מלפני אהל מועד וימלך על ישראל פ
דברי הימים ב 1 : 14 (ALEP)
יד ויאסף שלמה רכב ופרשים ויהי לו אלף וארבע מאות רכב ושנים עשר אלף פרשים ויניחם בערי הרכב ועם המלך בירושלם
דברי הימים ב 1 : 15 (ALEP)
טו ויתן המלך את הכסף ואת הזהב בירושלם--כאבנים ואת הארזים נתן כשקמים אשר בשפלה--לרב
דברי הימים ב 1 : 16 (ALEP)
טז ומוצא הסוסים אשר לשלמה ממצרים ומקוא--סחרי המלך מקוא יקחו במחיר
דברי הימים ב 1 : 17 (ALEP)
יז ויעלו ויוציאו ממצרים מרכבה בשש מאות כסף וסוס בחמשים ומאה וכן לכל מלכי החתים ומלכי ארם--בידם יוציאו ()יחויאמרשלמהלבנותביתלשםיהוהוביתלמלכותו
❮
❯