שמואל א 3 : 1 (ALEP)
א והנער שמואל משרת את יהוה לפני עלי ודבר יהוה היה יקר בימים ההם--אין חזון נפרץ {ס}
שמואל א 3 : 2 (ALEP)
ב ויהי ביום ההוא ועלי שכב במקומו ועינו החלו כהות לא יוכל לראות
שמואל א 3 : 3 (ALEP)
ג ונר אלהים טרם יכבה ושמואל שכב בהיכל יהוה אשר שם ארון אלהים {פ}
שמואל א 3 : 4 (ALEP)
ד ויקרא יהוה אל שמואל ויאמר הנני
שמואל א 3 : 5 (ALEP)
ה וירץ אל עלי ויאמר הנני כי קראת לי ויאמר לא קראתי שוב שכב וילך וישכב {ס}
שמואל א 3 : 6 (ALEP)
ו ויסף יהוה קרא עוד שמואל ויקם שמואל וילך אל עלי ויאמר הנני כי קראת לי ויאמר לא קראתי בני שוב שכב
שמואל א 3 : 7 (ALEP)
ז ושמואל טרם ידע את יהוה וטרם יגלה אליו דבר יהוה
שמואל א 3 : 8 (ALEP)
ח ויסף יהוה קרא שמואל בשלישת ויקם וילך אל עלי ויאמר הנני כי קראת לי ויבן עלי כי יהוה קרא לנער
שמואל א 3 : 9 (ALEP)
ט ויאמר עלי לשמואל לך שכב והיה אם יקרא אליך ואמרת דבר יהוה כי שמע עבדך וילך שמואל וישכב במקומו
שמואל א 3 : 10 (ALEP)
י ויבא יהוה ויתיצב ויקרא כפעם בפעם שמואל שמואל ויאמר שמואל דבר כי שמע עבדך {פ}
שמואל א 3 : 11 (ALEP)
יא ויאמר יהוה אל שמואל הנה אנכי עשה דבר בישראל אשר כל שמעו--תצלינה שתי אזניו
שמואל א 3 : 12 (ALEP)
יב ביום ההוא אקים אל עלי את כל אשר דברתי אל ביתו--החל וכלה
שמואל א 3 : 13 (ALEP)
יג והגדתי לו כי שפט אני את ביתו עד עולם--בעון אשר ידע כי מקללים להם בניו ולא כהה בם
שמואל א 3 : 14 (ALEP)
יד ולכן נשבעתי לבית עלי אם יתכפר עון בית עלי בזבח ובמנחה--עד עולם
שמואל א 3 : 15 (ALEP)
טו וישכב שמואל עד הבקר ויפתח את דלתות בית יהוה ושמואל ירא מהגיד את המראה אל עלי
שמואל א 3 : 16 (ALEP)
טז ויקרא עלי את שמואל ויאמר שמואל בני ויאמר הנני
שמואל א 3 : 17 (ALEP)
יז ויאמר מה הדבר אשר דבר אליך--אל נא תכחד ממני כה יעשה לך אלהים וכה יוסיף אם תכחד ממני דבר מכל הדבר אשר דבר אליך
שמואל א 3 : 18 (ALEP)
יח ויגד לו שמואל את כל הדברים ולא כחד ממנו ויאמר--יהוה הוא הטוב בעינו יעשה {פ}
שמואל א 3 : 19 (ALEP)
יט ויגדל שמואל ויהוה היה עמו ולא הפיל מכל דבריו ארצה
שמואל א 3 : 20 (ALEP)
כ וידע כל ישראל מדן ועד באר שבע כי נאמן שמואל לנביא ליהוה {ס}
שמואל א 3 : 21 (ALEP)
כא ויסף יהוה להראה בשלה כי נגלה יהוה אל שמואל בשלו בדבר יהוה {פ}
❮
❯