שמואל א 25 : 1 (ALEP)
א וימת שמואל--ויקבצו כל ישראל ויספדו לו ויקברהו בביתו ברמה ויקם דוד וירד אל מדבר פארן פ
שמואל א 25 : 2 (ALEP)
ב ואיש במעון ומעשהו בכרמל והאיש גדול מאד ולו צאן שלשת אלפים ואלף עזים ויהי בגזז את צאנו בכרמל
שמואל א 25 : 3 (ALEP)
ג ושם האיש נבל ושם אשתו אבגיל והאשה טובת שכל ויפת תאר והאיש קשה ורע מעללים והוא כלבו (כלבי)
שמואל א 25 : 4 (ALEP)
ד וישמע דוד במדבר כי גזז נבל את צאנו
שמואל א 25 : 5 (ALEP)
ה וישלח דוד עשרה נערים ויאמר דוד לנערים עלו כרמלה ובאתם אל נבל ושאלתם לו בשמי לשלום
שמואל א 25 : 6 (ALEP)
ו ואמרתם כה לחי ואתה שלום וביתך שלום וכל אשר לך שלום
שמואל א 25 : 7 (ALEP)
ז ועתה שמעתי כי גזזים לך עתה הרעים אשר לך היו עמנו--לא הכלמנום ולא נפקד להם מאומה כל ימי היותם בכרמל
שמואל א 25 : 8 (ALEP)
ח שאל את נעריך ויגידו לך וימצאו הנערים חן בעיניך--כי על יום טוב בנו תנה נא את אשר תמצא ידך לעבדיך ולבנך לדוד
שמואל א 25 : 9 (ALEP)
ט ויבאו נערי דוד וידברו אל נבל ככל הדברים האלה בשם דוד וינוחו
שמואל א 25 : 10 (ALEP)
י ויען נבל את עבדי דוד ויאמר מי דוד ומי בן ישי היום רבו עבדים המתפרצים איש מפני אדניו
שמואל א 25 : 11 (ALEP)
יא ולקחתי את לחמי ואת מימי ואת טבחתי אשר טבחתי לגזזי ונתתי לאנשים אשר לא ידעתי אי מזה המה
שמואל א 25 : 12 (ALEP)
יב ויהפכו נערי דוד לדרכם וישבו ויבאו ויגדו לו ככל הדברים האלה
שמואל א 25 : 13 (ALEP)
יג ויאמר דוד לאנשיו חגרו איש את חרבו ויחגרו איש את חרבו ויחגר גם דוד את חרבו ויעלו אחרי דוד כארבע מאות איש ומאתים ישבו על הכלים
שמואל א 25 : 14 (ALEP)
יד ולאביגיל אשת נבל הגיד נער אחד מהנערים לאמר הנה שלח דוד מלאכים מהמדבר לברך את אדנינו ויעט בהם
שמואל א 25 : 15 (ALEP)
טו והאנשים טבים לנו מאד ולא הכלמנו ולא פקדנו מאומה כל ימי התהלכנו אתם בהיותנו בשדה
שמואל א 25 : 16 (ALEP)
טז חומה היו עלינו גם לילה גם יומם כל ימי היותנו עמם רעים הצאן
שמואל א 25 : 17 (ALEP)
יז ועתה דעי וראי מה תעשי--כי כלתה הרעה אל אדנינו ועל כל ביתו והוא בן בליעל מדבר אליו
שמואל א 25 : 18 (ALEP)
יח ותמהר אבוגיל (אביגיל) ותקח מאתים לחם ושנים נבלי יין וחמש צאן עשוות (עשויות) וחמש סאים קלי ומאה צמקים ומאתים דבלים ותשם על החמרים
שמואל א 25 : 19 (ALEP)
יט ותאמר לנעריה עברו לפני הנני אחריכם באה ולאישה נבל לא הגידה
שמואל א 25 : 20 (ALEP)
כ והיה היא רכבת על החמור וירדת בסתר ההר והנה דוד ואנשיו ירדים לקראתה ותפגש אתם
שמואל א 25 : 21 (ALEP)
כא ודוד אמר אך לשקר שמרתי את כל אשר לזה במדבר ולא נפקד מכל אשר לו מאומה וישב לי רעה תחת טובה
שמואל א 25 : 22 (ALEP)
כב כה יעשה אלהים לאיבי דוד וכה יסיף אם אשאיר מכל אשר לו עד הבקר משתין בקיר
שמואל א 25 : 23 (ALEP)
כג ותרא אביגיל את דוד ותמהר ותרד מעל החמור ותפל לאפי דוד על פניה ותשתחו ארץ
שמואל א 25 : 24 (ALEP)
כד ותפל על רגליו ותאמר בי אני אדני העון ותדבר נא אמתך באזניך ושמע את דברי אמתך
שמואל א 25 : 25 (ALEP)
כה אל נא ישים אדני את לבו אל איש הבליעל הזה על נבל כי כשמו כן הוא--נבל שמו ונבלה עמו ואני אמתך--לא ראיתי את נערי אדני אשר שלחת
שמואל א 25 : 26 (ALEP)
כו ועתה אדני חי יהוה וחי נפשך אשר מנעך יהוה מבוא בדמים והושע ידך לך ועתה יהיו כנבל איביך והמבקשים אל אדני רעה
שמואל א 25 : 27 (ALEP)
כז ועתה הברכה הזאת אשר הביא שפחתך לאדני ונתנה לנערים המתהלכים ברגלי אדני
שמואל א 25 : 28 (ALEP)
כח שא נא לפשע אמתך כי עשה יעשה יהוה לאדני בית נאמן כי מלחמות יהוה אדני נלחם ורעה לא תמצא בך מימיך
שמואל א 25 : 29 (ALEP)
כט ויקם אדם לרדפך ולבקש את נפשך והיתה נפש אדני צרורה בצרור החיים את יהוה אלהיך ואת נפש איביך יקלענה בתוך כף הקלע
שמואל א 25 : 30 (ALEP)
ל והיה כי יעשה יהוה לאדני ככל אשר דבר את הטובה עליך--וצוך לנגיד על ישראל
שמואל א 25 : 31 (ALEP)
לא ולא תהיה זאת לך לפוקה ולמכשול לב לאדני ולשפך דם חנם ולהושיע אדני לו והיטב יהוה לאדני וזכרת את אמתך ס
שמואל א 25 : 32 (ALEP)
לב ויאמר דוד לאביגל ברוך יהוה אלהי ישראל אשר שלחך היום הזה לקראתי
שמואל א 25 : 33 (ALEP)
לג וברוך טעמך וברוכה את אשר כלתני היום הזה מבוא בדמים והשע ידי לי
שמואל א 25 : 34 (ALEP)
לד ואולם חי יהוה אלהי ישראל אשר מנעני מהרע אתך כי לולי מהרת ותבאתי (ותבאת) לקראתי--כי אם נותר לנבל עד אור הבקר משתין בקיר
שמואל א 25 : 35 (ALEP)
לה ויקח דוד מידה את אשר הביאה לו ולה אמר עלי לשלום לביתך--ראי שמעתי בקולך ואשא פניך
שמואל א 25 : 36 (ALEP)
לו ותבא אביגיל אל נבל והנה לו משתה בביתו כמשתה המלך ולב נבל טוב עליו והוא שכר עד מאד ולא הגידה לו דבר קטן וגדול--עד אור הבקר
שמואל א 25 : 37 (ALEP)
לז ויהי בבקר בצאת היין מנבל ותגד לו אשתו את הדברים האלה וימת לבו בקרבו והוא היה לאבן
שמואל א 25 : 38 (ALEP)
לח ויהי כעשרת הימים ויגף יהוה את נבל וימת
שמואל א 25 : 39 (ALEP)
לט וישמע דוד כי מת נבל ויאמר ברוך יהוה אשר רב את ריב חרפתי מיד נבל ואת עבדו חשך מרעה ואת רעת נבל השיב יהוה בראשו וישלח דוד וידבר באביגיל לקחתה לו לאשה
שמואל א 25 : 40 (ALEP)
מ ויבאו עבדי דוד אל אביגיל--הכרמלה וידברו אליה לאמר דוד שלחנו אליך לקחתך לו לאשה
שמואל א 25 : 41 (ALEP)
מא ותקם ותשתחו אפים ארצה ותאמר הנה אמתך לשפחה לרחץ רגלי עבדי אדני
שמואל א 25 : 42 (ALEP)
מב ותמהר ותקם אביגיל ותרכב על החמור וחמש נערתיה ההלכות לרגלה ותלך אחרי מלאכי דוד ותהי לו לאשה
שמואל א 25 : 43 (ALEP)
מג ואת אחינעם לקח דוד מיזרעאל ותהיין גם שתיהן לו לנשים ס
שמואל א 25 : 44 (ALEP)
מד ושאול נתן את מיכל בתו--אשת דוד לפלטי בן ליש אשר מגלים
❮
❯