שמואל א 23 : 1 (ALEP)
א ויגדו לדוד לאמר הנה פלשתים נלחמים בקעילה והמה שסים את הגרנות
שמואל א 23 : 2 (ALEP)
ב וישאל דוד ביהוה לאמר האלך והכיתי בפלשתים האלה ס ויאמר יהוה אל דוד לך והכית בפלשתים והושעת את קעילה
שמואל א 23 : 3 (ALEP)
ג ויאמרו אנשי דוד אליו הנה אנחנו פה ביהודה יראים ואף כי נלך קעלה אל מערכות פלשתים ס
שמואל א 23 : 4 (ALEP)
ד ויוסף עוד דוד לשאול ביהוה ויענהו יהוה ויאמר קום רד קעילה--כי אני נתן את פלשתים בידך
שמואל א 23 : 5 (ALEP)
ה וילך דוד ואנשו קעילה וילחם בפלשתים וינהג את מקניהם ויך בהם מכה גדולה וישע דוד את ישבי קעילה ס
שמואל א 23 : 6 (ALEP)
ו ויהי בברח אביתר בן אחימלך אל דוד--קעילה אפוד ירד בידו
שמואל א 23 : 7 (ALEP)
ז ויגד לשאול כי בא דוד קעילה ויאמר שאול נכר אתו אלהים בידי--כי נסגר לבוא בעיר דלתים ובריח
שמואל א 23 : 8 (ALEP)
ח וישמע שאול את כל העם למלחמה לרדת קעילה לצור אל דוד ואל אנשיו
שמואל א 23 : 9 (ALEP)
ט וידע דוד--כי עליו שאול מחריש הרעה ויאמר אל אביתר הכהן הגישה האפוד ס
שמואל א 23 : 10 (ALEP)
י ויאמר דוד יהוה אלהי ישראל שמע שמע עבדך כי מבקש שאול לבוא אל קעילה--לשחת לעיר בעבורי
שמואל א 23 : 11 (ALEP)
יא היסגרני בעלי קעילה בידו הירד שאול כאשר שמע עבדך--יהוה אלהי ישראל הגד נא לעבדך ס ויאמר יהוה ירד ס
שמואל א 23 : 12 (ALEP)
יב ויאמר דוד--היסגרו בעלי קעילה אתי ואת אנשי ביד שאול ויאמר יהוה יסגירו ס
שמואל א 23 : 13 (ALEP)
יג ויקם דוד ואנשיו כשש מאות איש ויצאו מקעלה ויתהלכו באשר יתהלכו ולשאול הגד כי נמלט דוד מקעילה ויחדל לצאת
שמואל א 23 : 14 (ALEP)
יד וישב דוד במדבר במצדות וישב בהר במדבר זיף ויבקשהו שאול כל הימים ולא נתנו אלהים בידו
שמואל א 23 : 15 (ALEP)
טו וירא דוד כי יצא שאול לבקש את נפשו ודוד במדבר זיף בחרשה ס
שמואל א 23 : 16 (ALEP)
טז ויקם יהונתן בן שאול וילך אל דוד חרשה ויחזק את ידו באלהים
שמואל א 23 : 17 (ALEP)
יז ויאמר אליו אל תירא כי לא תמצאך יד שאול אבי ואתה תמלך על ישראל ואנכי אהיה לך למשנה וגם שאול אבי ידע כן
שמואל א 23 : 18 (ALEP)
יח ויכרתו שניהם ברית לפני יהוה וישב דוד בחרשה ויהונתן הלך לביתו ס
שמואל א 23 : 19 (ALEP)
יט ויעלו זפים אל שאול הגבעתה לאמר הלוא דוד מסתתר עמנו במצדות בחרשה--בגבעת החכילה אשר מימין הישימון
שמואל א 23 : 20 (ALEP)
כ ועתה לכל אות נפשך המלך לרדת--רד ולנו הסגירו ביד המלך
שמואל א 23 : 21 (ALEP)
כא ויאמר שאול ברוכים אתם ליהוה כי חמלתם עלי
שמואל א 23 : 22 (ALEP)
כב לכו נא הכינו עוד ודעו וראו את מקומו אשר תהיה רגלו--מי ראהו שם כי אמר אלי ערום יערם הוא
שמואל א 23 : 23 (ALEP)
כג וראו ודעו מכל המחבאים אשר יתחבא שם ושבתם אלי אל נכון והלכתי אתכם והיה אם ישנו בארץ--וחפשתי אתו בכל אלפי יהודה
שמואל א 23 : 24 (ALEP)
כד ויקומו וילכו זיפה לפני שאול ודוד ואנשיו במדבר מעון בערבה--אל ימין הישימון
שמואל א 23 : 25 (ALEP)
כה וילך שאול ואנשיו לבקש ויגדו לדוד וירד הסלע וישב במדבר מעון וישמע שאול וירדף אחרי דוד מדבר מעון
שמואל א 23 : 26 (ALEP)
כו וילך שאול מצד ההר מזה ודוד ואנשיו מצד ההר מזה ויהי דוד נחפז ללכת מפני שאול ושאול ואנשיו עטרים אל דוד ואל אנשיו לתפשם
שמואל א 23 : 27 (ALEP)
כז ומלאך בא אל שאול לאמר מהרה ולכה כי פשטו פלשתים על הארץ
שמואל א 23 : 28 (ALEP)
כח וישב שאול מרדף אחרי דוד וילך לקראת פלשתים על כן קראו למקום ההוא סלע המחלקות
שמואל א 23 : 29 (ALEP)
כט ויעל דוד משם וישב במצדות עין גדי ס
❮
❯