שמואל א 2 : 1 (ALEP)
א ותתפלל חנה ותאמר עלץ לבי ביהוה רמה קרני ביהוה רחב פי על אויבי כי שמחתי בישועתך
שמואל א 2 : 2 (ALEP)
ב אין קדוש כיהוה כי אין בלתך ואין צור כאלהינו
שמואל א 2 : 3 (ALEP)
ג אל תרבו תדברו גבהה גבהה יצא עתק מפיכם כי אל דעות יהוה ולא (ולו) נתכנו עללות
שמואל א 2 : 4 (ALEP)
ד קשת גברים חתים ונכשלים אזרו חיל
שמואל א 2 : 5 (ALEP)
ה שבעים בלחם נשכרו ורעבים חדלו עד עקרה ילדה שבעה ורבת בנים אמללה
שמואל א 2 : 6 (ALEP)
ו יהוה ממית ומחיה מוריד שאול ויעל
שמואל א 2 : 7 (ALEP)
ז יהוה מוריש ומעשיר משפיל אף מרומם
שמואל א 2 : 8 (ALEP)
ח מקים מעפר דל מאשפת ירים אביון להושיב עם נדיבים וכסא כבוד ינחלם כי ליהוה מצקי ארץ וישת עליהם תבל
שמואל א 2 : 9 (ALEP)
ט רגלי חסידו ישמר ורשעים בחשך ידמו כי לא בכח יגבר איש
שמואל א 2 : 10 (ALEP)
י יהוה יחתו מריבו עלו בשמים ירעם--יהוה ידין אפסי ארץ ויתן עז למלכו וירם קרן משיחו פ
שמואל א 2 : 11 (ALEP)
יא וילך אלקנה הרמתה על ביתו והנער היה משרת את יהוה את פני עלי הכהן
שמואל א 2 : 12 (ALEP)
יב ובני עלי בני בליעל לא ידעו את יהוה
שמואל א 2 : 13 (ALEP)
יג ומשפט הכהנים את העם--כל איש זבח זבח ובא נער הכהן כבשל הבשר והמזלג שלש השנים בידו
שמואל א 2 : 14 (ALEP)
יד והכה בכיור או בדוד או בקלחת או בפרור--כל אשר יעלה המזלג יקח הכהן בו ככה יעשו לכל ישראל הבאים שם בשלה
שמואל א 2 : 15 (ALEP)
טו גם בטרם יקטרון את החלב ובא נער הכהן ואמר לאיש הזבח תנה בשר לצלות לכהן ולא יקח ממך בשר מבשל כי אם חי
שמואל א 2 : 16 (ALEP)
טז ויאמר אליו האיש קטר יקטירון כיום החלב וקח לך כאשר תאוה נפשך ואמר לו (לא) כי עתה תתן--ואם לא לקחתי בחזקה
שמואל א 2 : 17 (ALEP)
יז ותהי חטאת הנערים גדולה מאד את פני יהוה כי נאצו האנשים את מנחת יהוה
שמואל א 2 : 18 (ALEP)
יח ושמואל משרת את פני יהוה נער חגור אפוד בד
שמואל א 2 : 19 (ALEP)
יט ומעיל קטן תעשה לו אמו והעלתה לו מימים ימימה--בעלותה את אישה לזבח את זבח הימים
שמואל א 2 : 20 (ALEP)
כ וברך עלי את אלקנה ואת אשתו ואמר ישם יהוה לך זרע מן האשה הזאת תחת השאלה אשר שאל ליהוה והלכו למקומו
שמואל א 2 : 21 (ALEP)
כא כי פקד יהוה את חנה ותהר ותלד שלשה בנים ושתי בנות ויגדל הנער שמואל עם יהוה ס
שמואל א 2 : 22 (ALEP)
כב ועלי זקן מאד ושמע את כל אשר יעשון בניו לכל ישראל ואת אשר ישכבון את הנשים הצבאות פתח אהל מועד
שמואל א 2 : 23 (ALEP)
כג ויאמר להם למה תעשון כדברים האלה אשר אנכי שמע את דבריכם רעים מאת כל העם אלה
שמואל א 2 : 24 (ALEP)
כד אל בני כי לוא טובה השמעה אשר אנכי שמע מעברים עם יהוה
שמואל א 2 : 25 (ALEP)
כה אם יחטא איש לאיש ופללו אלהים ואם ליהוה יחטא איש מי יתפלל לו ולא ישמעו לקול אביהם כי חפץ יהוה להמיתם
שמואל א 2 : 26 (ALEP)
כו והנער שמואל הלך וגדל וטוב גם עם יהוה וגם עם אנשים פ
שמואל א 2 : 27 (ALEP)
כז ויבא איש אלהים אל עלי ויאמר אליו כה אמר יהוה הנגלה נגליתי אל בית אביך בהיותם במצרים לבית פרעה
שמואל א 2 : 28 (ALEP)
כח ובחר אתו מכל שבטי ישראל לי לכהן לעלות על מזבחי להקטיר קטרת לשאת אפוד לפני ואתנה לבית אביך את כל אשי בני ישראל
שמואל א 2 : 29 (ALEP)
כט למה תבעטו בזבחי ובמנחתי אשר צויתי מעון ותכבד את בניך ממני להבריאכם מראשית כל מנחת ישראל לעמי
שמואל א 2 : 30 (ALEP)
ל לכן נאם יהוה אלהי ישראל אמור אמרתי ביתך ובית אביך יתהלכו לפני עד עולם ועתה נאם יהוה חלילה לי כי מכבדי אכבד ובזי יקלו
שמואל א 2 : 31 (ALEP)
לא הנה ימים באים וגדעתי את זרעך ואת זרע בית אביך--מהיות זקן בביתך
שמואל א 2 : 32 (ALEP)
לב והבטת צר מעון בכל אשר ייטיב את ישראל ולא יהיה זקן בביתך כל הימים
שמואל א 2 : 33 (ALEP)
לג ואיש לא אכרית לך מעם מזבחי לכלות את עיניך ולאדיב את נפשך וכל מרבית ביתך ימותו אנשים
שמואל א 2 : 34 (ALEP)
לד וזה לך האות אשר יבא אל שני בניך--אל חפני ופינחס ביום אחד ימותו שניהם
שמואל א 2 : 35 (ALEP)
לה והקימתי לי כהן נאמן כאשר בלבבי ובנפשי יעשה ובניתי לו בית נאמן והתהלך לפני משיחי כל הימים
שמואל א 2 : 36 (ALEP)
לו והיה כל הנותר בביתך יבוא להשתחות לו לאגורת כסף וככר לחם ואמר ספחני נא אל אחת הכהנות--לאכל פת לחם פ
❮
❯