שמואל א 19 : 1 (ALEP)
א וידבר שאול אל יונתן בנו ואל כל עבדיו להמית את דוד ויהונתן בן שאול חפץ בדוד מאד
שמואל א 19 : 2 (ALEP)
ב ויגד יהונתן לדוד לאמר מבקש שאול אבי להמיתך ועתה השמר נא בבקר וישבת בסתר ונחבאת
שמואל א 19 : 3 (ALEP)
ג ואני אצא ועמדתי ליד אבי בשדה אשר אתה שם ואני אדבר בך אל אבי וראיתי מה והגדתי לך ס
שמואל א 19 : 4 (ALEP)
ד וידבר יהונתן בדוד טוב אל שאול אביו ויאמר אליו אל יחטא המלך בעבדו בדוד כי לוא חטא לך וכי מעשיו טוב לך מאד
שמואל א 19 : 5 (ALEP)
ה וישם את נפשו בכפו ויך את הפלשתי ויעש יהוה תשועה גדולה לכל ישראל--ראית ותשמח ולמה תחטא בדם נקי להמית את דוד חנם
שמואל א 19 : 6 (ALEP)
ו וישמע שאול בקול יהונתן וישבע שאול חי יהוה אם יומת
שמואל א 19 : 7 (ALEP)
ז ויקרא יהונתן לדוד ויגד לו יהונתן את כל הדברים האלה ויבא יהונתן את דוד אל שאול ויהי לפניו כאתמול שלשום ס
שמואל א 19 : 8 (ALEP)
ח ותוסף המלחמה להיות ויצא דוד וילחם בפלשתים ויך בהם מכה גדולה וינסו מפניו
שמואל א 19 : 9 (ALEP)
ט ותהי רוח יהוה רעה אל שאול והוא בביתו ישב וחניתו בידו ודוד מנגן ביד
שמואל א 19 : 10 (ALEP)
י ויבקש שאול להכות בחנית בדוד ובקיר ויפטר מפני שאול ויך את החנית בקיר ודוד נס וימלט בלילה הוא פ
שמואל א 19 : 11 (ALEP)
יא וישלח שאול מלאכים אל בית דוד לשמרו ולהמיתו בבקר ותגד לדוד מיכל אשתו לאמר אם אינך ממלט את נפשך הלילה מחר אתה מומת
שמואל א 19 : 12 (ALEP)
יב ותרד מיכל את דוד בעד החלון וילך ויברח וימלט
שמואל א 19 : 13 (ALEP)
יג ותקח מיכל את התרפים ותשם אל המטה ואת כביר העזים שמה מראשתיו ותכס בבגד ס
שמואל א 19 : 14 (ALEP)
יד וישלח שאול מלאכים לקחת את דוד ותאמר חלה הוא ס
שמואל א 19 : 15 (ALEP)
טו וישלח שאול את המלאכים לראות את דוד לאמר העלו אתו במטה אלי להמתו
שמואל א 19 : 16 (ALEP)
טז ויבאו המלאכים והנה התרפים אל המטה וכביר העזים מראשתיו ס
שמואל א 19 : 17 (ALEP)
יז ויאמר שאול אל מיכל למה ככה רמיתני ותשלחי את איבי וימלט ותאמר מיכל אל שאול הוא אמר אלי שלחני למה אמיתך
שמואל א 19 : 18 (ALEP)
יח ודוד ברח וימלט ויבא אל שמואל הרמתה ויגד לו את כל אשר עשה לו שאול וילך הוא ושמואל וישבו בנוית (בניות)
שמואל א 19 : 19 (ALEP)
יט ויגד לשאול לאמר הנה דוד בנוית (בניות) ברמה
שמואל א 19 : 20 (ALEP)
כ וישלח שאול מלאכים לקחת את דוד וירא את להקת הנביאים נבאים ושמואל עמד נצב עליהם ותהי על מלאכי שאול רוח אלהים ויתנבאו גם המה
שמואל א 19 : 21 (ALEP)
כא ויגדו לשאול וישלח מלאכים אחרים ויתנבאו גם המה ס ויסף שאול וישלח מלאכים שלשים ויתנבאו גם המה
שמואל א 19 : 22 (ALEP)
כב וילך גם הוא הרמתה ויבא עד בור הגדול אשר בשכו וישאל ויאמר איפה שמואל ודוד ויאמר הנה בנוית (בניות) ברמה
שמואל א 19 : 23 (ALEP)
כג וילך שם אל נוית (ניות) ברמה ותהי עליו גם הוא רוח אלהים וילך הלוך ויתנבא עד באו בנוית (בניות) ברמה
שמואל א 19 : 24 (ALEP)
כד ויפשט גם הוא בגדיו ויתנבא גם הוא לפני שמואל ויפל ערם כל היום ההוא וכל הלילה על כן יאמרו--הגם שאול בנביאם פ
❮
❯
1
2
3
4
5
6
7
8
9
10
11
12
13
14
15
16
17
18
19
20
21
22
23
24