שמואל א 15 : 1 (ALEP)
א ויאמר שמואל אל שאול אתי שלח יהוה למשחך למלך על עמו על ישראל ועתה שמע לקול דברי יהוה {ס}
שמואל א 15 : 2 (ALEP)
ב כה אמר יהוה צבאות פקדתי את אשר עשה עמלק לישראל--אשר שם לו בדרך בעלתו ממצרים
שמואל א 15 : 3 (ALEP)
ג עתה לך והכיתה את עמלק והחרמתם את כל אשר לו ולא תחמל עליו והמתה מאיש עד אשה מעלל ועד יונק משור ועד שה מגמל ועד חמור {ס}
שמואל א 15 : 4 (ALEP)
ד וישמע שאול את העם ויפקדם בטלאים מאתים אלף רגלי ועשרת אלפים את איש יהודה
שמואל א 15 : 5 (ALEP)
ה ויבא שאול עד עיר עמלק וירב בנחל
שמואל א 15 : 6 (ALEP)
ו ויאמר שאול אל הקיני לכו סרו רדו מתוך עמלקי פן אספך עמו ואתה עשיתה חסד עם כל בני ישראל בעלותם ממצרים ויסר קיני מתוך עמלק
שמואל א 15 : 7 (ALEP)
ז ויך שאול את עמלק מחוילה בואך שור אשר על פני מצרים
שמואל א 15 : 8 (ALEP)
ח ויתפש את אגג מלך עמלק חי ואת כל העם החרים לפי חרב
שמואל א 15 : 9 (ALEP)
ט ויחמל שאול והעם על אגג ועל מיטב הצאן והבקר והמשנים ועל הכרים ועל כל הטוב ולא אבו החרימם וכל המלאכה נמבזה ונמס אתה החרימו {פ}
שמואל א 15 : 10 (ALEP)
י ויהי דבר יהוה אל שמואל לאמר
שמואל א 15 : 11 (ALEP)
יא נחמתי כי המלכתי את שאול למלך--כי שב מאחרי ואת דברי לא הקים ויחר לשמואל ויזעק אל יהוה כל הלילה
שמואל א 15 : 12 (ALEP)
יב וישכם שמואל לקראת שאול בבקר ויגד לשמואל לאמר בא שאול הכרמלה והנה מציב לו יד ויסב ויעבר וירד הגלגל
שמואל א 15 : 13 (ALEP)
יג ויבא שמואל אל שאול ויאמר לו שאול ברוך אתה ליהוה--הקימתי את דבר יהוה
שמואל א 15 : 14 (ALEP)
יד ויאמר שמואל ומה קול הצאן הזה באזני וקול הבקר אשר אנכי שמע
שמואל א 15 : 15 (ALEP)
טו ויאמר שאול מעמלקי הביאום אשר חמל העם על מיטב הצאן והבקר למען זבח ליהוה אלהיך ואת היותר החרמנו {פ}
שמואל א 15 : 16 (ALEP)
טז ויאמר שמואל אל שאול הרף ואגידה לך את אשר דבר יהוה אלי הלילה ויאמרו (ויאמר) לו דבר {ס}
שמואל א 15 : 17 (ALEP)
יז ויאמר שמואל--הלוא אם קטן אתה בעיניך ראש שבטי ישראל אתה וימשחך יהוה למלך על ישראל
שמואל א 15 : 18 (ALEP)
יח וישלחך יהוה בדרך ויאמר לך והחרמתה את החטאים את עמלק ונלחמת בו עד כלותם אתם
שמואל א 15 : 19 (ALEP)
יט ולמה לא שמעת בקול יהוה ותעט אל השלל ותעש הרע בעיני יהוה {ס}
שמואל א 15 : 20 (ALEP)
כ ויאמר שאול אל שמואל אשר שמעתי בקול יהוה ואלך בדרך אשר שלחני יהוה ואביא את אגג מלך עמלק ואת עמלק החרמתי
שמואל א 15 : 21 (ALEP)
כא ויקח העם מהשלל צאן ובקר ראשית החרם לזבח ליהוה אלהיך בגלגל {ס}
שמואל א 15 : 22 (ALEP)
כב ויאמר שמואל החפץ ליהוה בעלות וזבחים כשמע בקול יהוה הנה שמע מזבח טוב להקשיב מחלב אילים
שמואל א 15 : 23 (ALEP)
כג כי חטאת קסם מרי ואון ותרפים הפצר יען מאסת את דבר יהוה וימאסך ממלך {ס}
שמואל א 15 : 24 (ALEP)
כד ויאמר שאול אל שמואל חטאתי כי עברתי את פי יהוה ואת דבריך כי יראתי את העם ואשמע בקולם
שמואל א 15 : 25 (ALEP)
כה ועתה שא נא את חטאתי ושוב עמי ואשתחוה ליהוה
שמואל א 15 : 26 (ALEP)
כו ויאמר שמואל אל שאול לא אשוב עמך כי מאסתה את דבר יהוה וימאסך יהוה מהיות מלך על ישראל {ס}
שמואל א 15 : 27 (ALEP)
כז ויסב שמואל ללכת ויחזק בכנף מעילו ויקרע {ס}
שמואל א 15 : 28 (ALEP)
כח ויאמר אליו שמואל קרע יהוה את ממלכות ישראל מעליך היום ונתנה לרעך הטוב ממך {ס}
שמואל א 15 : 29 (ALEP)
כט וגם נצח ישראל לא ישקר ולא ינחם כי לא אדם הוא להנחם
שמואל א 15 : 30 (ALEP)
ל ויאמר חטאתי--עתה כבדני נא נגד זקני עמי ונגד ישראל ושוב עמי והשתחויתי ליהוה אלהיך
שמואל א 15 : 31 (ALEP)
לא וישב שמואל אחרי שאול וישתחו שאול ליהוה {ס}
שמואל א 15 : 32 (ALEP)
לב ויאמר שמואל הגישו אלי את אגג מלך עמלק וילך אליו אגג מעדנת ויאמר אגג אכן סר מר המות {ס}
שמואל א 15 : 33 (ALEP)
לג ויאמר שמואל--כאשר שכלה נשים חרבך כן תשכל מנשים אמך וישסף שמואל את אגג לפני יהוה בגלגל {ס}
שמואל א 15 : 34 (ALEP)
לד וילך שמואל הרמתה ושאול עלה אל ביתו גבעת שאול
שמואל א 15 : 35 (ALEP)
לה ולא יסף שמואל לראות את שאול עד יום מותו כי התאבל שמואל אל שאול ויהוה נחם כי המליך את שאול על ישראל {פ}
❮
❯