שמואל א 12 : 1 (ALEP)
א ויאמר שמואל אל כל ישראל הנה שמעתי בקלכם לכל אשר אמרתם לי ואמליך עליכם מלך
שמואל א 12 : 2 (ALEP)
ב ועתה הנה המלך מתהלך לפניכם ואני זקנתי ושבתי ובני הנם אתכם ואני התהלכתי לפניכם מנערי עד היום הזה
שמואל א 12 : 3 (ALEP)
ג הנני ענו בי נגד יהוה ונגד משיחו את שור מי לקחתי וחמור מי לקחתי ואת מי עשקתי את מי רצותי ומיד מי לקחתי כפר ואעלים עיני בו ואשיב לכם
שמואל א 12 : 4 (ALEP)
ד ויאמרו לא עשקתנו ולא רצותנו ולא לקחת מיד איש מאומה
שמואל א 12 : 5 (ALEP)
ה ויאמר אליהם עד יהוה בכם ועד משיחו היום הזה--כי לא מצאתם בידי מאומה ויאמר עד {פ}
שמואל א 12 : 6 (ALEP)
ו ויאמר שמואל אל העם יהוה אשר עשה את משה ואת אהרן ואשר העלה את אבתיכם מארץ מצרים
שמואל א 12 : 7 (ALEP)
ז ועתה התיצבו ואשפטה אתכם--לפני יהוה את כל צדקות יהוה אשר עשה אתכם ואת אבותיכם
שמואל א 12 : 8 (ALEP)
ח כאשר בא יעקב מצרים--ויזעקו אבותיכם אל יהוה וישלח יהוה את משה ואת אהרן ויוציאו את אבתיכם ממצרים וישבום במקום הזה
שמואל א 12 : 9 (ALEP)
ט וישכחו את יהוה אלהיהם וימכר אתם ביד סיסרא שר צבא חצור וביד פלשתים וביד מלך מואב וילחמו בם
שמואל א 12 : 10 (ALEP)
י ויזעקו אל יהוה ויאמר (ויאמרו) חטאנו כי עזבנו את יהוה ונעבד את הבעלים ואת העשתרות ועתה הצילנו מיד איבינו--ונעבדך
שמואל א 12 : 11 (ALEP)
יא וישלח יהוה את ירבעל ואת בדן ואת יפתח ואת שמואל ויצל אתכם מיד איביכם מסביב ותשבו בטח
שמואל א 12 : 12 (ALEP)
יב ותראו כי נחש מלך בני עמון בא עליכם ותאמרו לי לא כי מלך ימלך עלינו ויהוה אלהיכם מלככם
שמואל א 12 : 13 (ALEP)
יג ועתה הנה המלך אשר בחרתם--אשר שאלתם והנה נתן יהוה עליכם מלך
שמואל א 12 : 14 (ALEP)
יד אם תיראו את יהוה ועבדתם אתו ושמעתם בקולו ולא תמרו את פי יהוה--והיתם גם אתם וגם המלך אשר מלך עליכם אחר יהוה אלהיכם
שמואל א 12 : 15 (ALEP)
טו ואם לא תשמעו בקול יהוה ומריתם את פי יהוה--והיתה יד יהוה בכם ובאבתיכם
שמואל א 12 : 16 (ALEP)
טז גם עתה התיצבו וראו את הדבר הגדול הזה אשר יהוה עשה לעיניכם
שמואל א 12 : 17 (ALEP)
יז הלוא קציר חטים היום--אקרא אל יהוה ויתן קלות ומטר ודעו וראו כי רעתכם רבה אשר עשיתם בעיני יהוה לשאול לכם מלך {ס}
שמואל א 12 : 18 (ALEP)
יח ויקרא שמואל אל יהוה ויתן יהוה קלת ומטר ביום ההוא ויירא כל העם מאד את יהוה ואת שמואל
שמואל א 12 : 19 (ALEP)
יט ויאמרו כל העם אל שמואל התפלל בעד עבדיך אל יהוה אלהיך--ואל נמות כי יספנו על כל חטאתינו רעה לשאל לנו מלך
שמואל א 12 : 20 (ALEP)
כ ויאמר שמואל אל העם אל תיראו--אתם עשיתם את כל הרעה הזאת אך אל תסורו מאחרי יהוה ועבדתם את יהוה בכל לבבכם
שמואל א 12 : 21 (ALEP)
כא ולא תסורו כי אחרי התהו אשר לא יועילו ולא יצילו--כי תהו המה
שמואל א 12 : 22 (ALEP)
כב כי לא יטש יהוה את עמו--בעבור שמו הגדול כי הואיל יהוה לעשות אתכם לו לעם
שמואל א 12 : 23 (ALEP)
כג גם אנכי חלילה לי מחטא ליהוה--מחדל להתפלל בעדכם והוריתי אתכם בדרך הטובה והישרה
שמואל א 12 : 24 (ALEP)
כד אך יראו את יהוה ועבדתם אתו באמת--בכל לבבכם כי ראו את אשר הגדל עמכם
שמואל א 12 : 25 (ALEP)
כה ואם הרע תרעו--גם אתם גם מלככם תספו {פ}
❮
❯