שמואל א 1 : 1 (ALEP)
א ויהי איש אחד מן הרמתים צופים--מהר אפרים ושמו אלקנה בן ירחם בן אליהוא בן תחו בן צוף--אפרתי
שמואל א 1 : 2 (ALEP)
ב ולו שתי נשים--שם אחת חנה ושם השנית פננה ויהי לפננה ילדים ולחנה אין ילדים
שמואל א 1 : 3 (ALEP)
ג ועלה האיש ההוא מעירו מימים ימימה להשתחות ולזבח ליהוה צבאות בשלה ושם שני בני עלי חפני ופנחס כהנים ליהוה
שמואל א 1 : 4 (ALEP)
ד ויהי היום ויזבח אלקנה ונתן לפננה אשתו ולכל בניה ובנותיה--מנות
שמואל א 1 : 5 (ALEP)
ה ולחנה יתן מנה אחת אפים כי את חנה אהב ויהוה סגר רחמה
שמואל א 1 : 6 (ALEP)
ו וכעסתה צרתה גם כעס בעבור הרעמה כי סגר יהוה בעד רחמה
שמואל א 1 : 7 (ALEP)
ז וכן יעשה שנה בשנה מדי עלתה בבית יהוה--כן תכעסנה ותבכה ולא תאכל
שמואל א 1 : 8 (ALEP)
ח ויאמר לה אלקנה אישה חנה למה תבכי ולמה לא תאכלי ולמה ירע לבבך הלוא אנכי טוב לך מעשרה בנים
שמואל א 1 : 9 (ALEP)
ט ותקם חנה אחרי אכלה בשלה ואחרי שתה ועלי הכהן ישב על הכסא על מזוזת היכל יהוה
שמואל א 1 : 10 (ALEP)
י והיא מרת נפש ותתפלל על יהוה ובכה תבכה
שמואל א 1 : 11 (ALEP)
יא ותדר נדר ותאמר יהוה צבאות אם ראה תראה בעני אמתך וזכרתני ולא תשכח את אמתך ונתתה לאמתך זרע אנשים--ונתתיו ליהוה כל ימי חייו ומורה לא יעלה על ראשו
שמואל א 1 : 12 (ALEP)
יב והיה כי הרבתה להתפלל לפני יהוה ועלי שמר את פיה
שמואל א 1 : 13 (ALEP)
יג וחנה היא מדברת על לבה--רק שפתיה נעות וקולה לא ישמע ויחשבה עלי לשכרה
שמואל א 1 : 14 (ALEP)
יד ויאמר אליה עלי עד מתי תשתכרין הסירי את יינך מעליך
שמואל א 1 : 15 (ALEP)
טו ותען חנה ותאמר לא אדני אשה קשת רוח אנכי ויין ושכר לא שתיתי ואשפך את נפשי לפני יהוה
שמואל א 1 : 16 (ALEP)
טז אל תתן את אמתך לפני בת בליעל כי מרב שיחי וכעסי דברתי עד הנה
שמואל א 1 : 17 (ALEP)
יז ויען עלי ויאמר לכי לשלום ואלהי ישראל יתן את שלתך אשר שאלת מעמו
שמואל א 1 : 18 (ALEP)
יח ותאמר תמצא שפחתך חן בעיניך ותלך האשה לדרכה ותאכל ופניה לא היו לה עוד
שמואל א 1 : 19 (ALEP)
יט וישכמו בבקר וישתחוו לפני יהוה וישבו ויבאו אל ביתם הרמתה וידע אלקנה את חנה אשתו ויזכרה יהוה
שמואל א 1 : 20 (ALEP)
כ ויהי לתקפות הימים ותהר חנה ותלד בן ותקרא את שמו שמואל כי מיהוה שאלתיו
שמואל א 1 : 21 (ALEP)
כא ויעל האיש אלקנה וכל ביתו לזבח ליהוה את זבח הימים ואת נדרו
שמואל א 1 : 22 (ALEP)
כב וחנה לא עלתה כי אמרה לאישה עד יגמל הנער והבאתיו ונראה את פני יהוה וישב שם עד עולם
שמואל א 1 : 23 (ALEP)
כג ויאמר לה אלקנה אישה עשי הטוב בעיניך שבי עד גמלך אתו--אך יקם יהוה את דברו ותשב האשה ותינק את בנה עד גמלה אתו
שמואל א 1 : 24 (ALEP)
כד ותעלהו עמה כאשר גמלתו בפרים שלשה ואיפה אחת קמח ונבל יין ותבאהו בית יהוה שלו והנער נער
שמואל א 1 : 25 (ALEP)
כה וישחטו את הפר ויבאו את הנער אל עלי
שמואל א 1 : 26 (ALEP)
כו ותאמר בי אדני חי נפשך אדני אני האשה הנצבת עמכה בזה להתפלל אל יהוה
שמואל א 1 : 27 (ALEP)
כז אל הנער הזה התפללתי ויתן יהוה לי את שאלתי אשר שאלתי מעמו
שמואל א 1 : 28 (ALEP)
כח וגם אנכי השאלתהו ליהוה כל הימים אשר היה הוא שאול ליהוה וישתחו שם ליהוה ס
❮
❯