מלכים א 3 : 1 (ALEP)
א ויתחתן שלמה את פרעה מלך מצרים ויקח את בת פרעה ויביאה אל עיר דוד עד כלתו לבנות את ביתו ואת בית יהוה ואת חומת ירושלם סביב
מלכים א 3 : 2 (ALEP)
ב רק העם מזבחים בבמות כי לא נבנה בית לשם יהוה עד הימים ההם פ
מלכים א 3 : 3 (ALEP)
ג ויאהב שלמה את יהוה ללכת בחקות דוד אביו רק בבמות--הוא מזבח ומקטיר
מלכים א 3 : 4 (ALEP)
ד וילך המלך גבענה לזבח שם כי היא הבמה הגדולה אלף עלות יעלה שלמה על המזבח ההוא
מלכים א 3 : 5 (ALEP)
ה בגבעון נראה יהוה אל שלמה--בחלום הלילה ויאמר אלהים שאל מה אתן לך
מלכים א 3 : 6 (ALEP)
ו ויאמר שלמה אתה עשית עם עבדך דוד אבי חסד גדול כאשר הלך לפניך באמת ובצדקה ובישרת לבב עמך ותשמר לו את החסד הגדול הזה ותתן לו בן ישב על כסאו כיום הזה
מלכים א 3 : 7 (ALEP)
ז ועתה יהוה אלהי אתה המלכת את עבדך תחת דוד אבי ואנכי נער קטן לא אדע צאת ובא
מלכים א 3 : 8 (ALEP)
ח ועבדך--בתוך עמך אשר בחרת עם רב אשר לא ימנה ולא יספר מרב
מלכים א 3 : 9 (ALEP)
ט ונתת לעבדך לב שמע לשפט את עמך להבין בין טוב לרע כי מי יוכל לשפט את עמך הכבד הזה
מלכים א 3 : 10 (ALEP)
י וייטב הדבר בעיני אדני כי שאל שלמה את הדבר הזה
מלכים א 3 : 11 (ALEP)
יא ויאמר אלהים אליו יען אשר שאלת את הדבר הזה ולא שאלת לך ימים רבים ולא שאלת לך עשר ולא שאלת נפש איביך ושאלת לך הבין לשמע משפט
מלכים א 3 : 12 (ALEP)
יב הנה עשיתי כדבריך הנה נתתי לך לב חכם ונבון אשר כמוך לא היה לפניך ואחריך לא יקום כמוך
מלכים א 3 : 13 (ALEP)
יג וגם אשר לא שאלת נתתי לך גם עשר גם כבוד אשר לא היה כמוך איש במלכים כל ימיך
מלכים א 3 : 14 (ALEP)
יד ואם תלך בדרכי לשמר חקי ומצותי כאשר הלך דויד אביך--והארכתי את ימיך ס
מלכים א 3 : 15 (ALEP)
טו ויקץ שלמה והנה חלום ויבוא ירושלם ויעמד לפני ארון ברית אדני ויעל עלות ויעש שלמים ויעש משתה לכל עבדיו פ
מלכים א 3 : 16 (ALEP)
טז אז תבאנה שתים נשים זנות--אל המלך ותעמדנה לפניו
מלכים א 3 : 17 (ALEP)
יז ותאמר האשה האחת בי אדני אני והאשה הזאת ישבת בבית אחד ואלד עמה בבית
מלכים א 3 : 18 (ALEP)
יח ויהי ביום השלישי ללדתי ותלד גם האשה הזאת ואנחנו יחדו אין זר אתנו בבית זולתי שתים אנחנו בבית
מלכים א 3 : 19 (ALEP)
יט וימת בן האשה הזאת לילה אשר שכבה עליו
מלכים א 3 : 20 (ALEP)
כ ותקם בתוך הלילה ותקח את בני מאצלי ואמתך ישנה ותשכיבהו בחיקה ואת בנה המת השכיבה בחיקי
מלכים א 3 : 21 (ALEP)
כא ואקם בבקר להיניק את בני והנה מת ואתבונן אליו בבקר והנה לא היה בני אשר ילדתי
מלכים א 3 : 22 (ALEP)
כב ותאמר האשה האחרת לא כי בני החי ובנך המת וזאת אמרת לא כי בנך המת ובני החי ותדברנה לפני המלך
מלכים א 3 : 23 (ALEP)
כג ויאמר המלך--זאת אמרת זה בני החי ובנך המת וזאת אמרת לא כי בנך המת ובני החי פ
מלכים א 3 : 24 (ALEP)
כד ויאמר המלך קחו לי חרב ויבאו החרב לפני המלך
מלכים א 3 : 25 (ALEP)
כה ויאמר המלך גזרו את הילד החי לשנים ותנו את החצי לאחת ואת החצי לאחת
מלכים א 3 : 26 (ALEP)
כו ותאמר האשה אשר בנה החי אל המלך כי נכמרו רחמיה על בנה ותאמר בי אדני תנו לה את הילוד החי והמת אל תמיתהו וזאת אמרת גם לי גם לך לא יהיה--גזרו
מלכים א 3 : 27 (ALEP)
כז ויען המלך ויאמר תנו לה את הילוד החי והמת לא תמיתהו היא אמו ס
מלכים א 3 : 28 (ALEP)
כח וישמעו כל ישראל את המשפט אשר שפט המלך ויראו מפני המלך כי ראו כי חכמת אלהים בקרבו לעשות משפט ס
❮
❯