מלכים א 2 : 1 (ALEP)
א ויקרבו ימי דוד למות ויצו את שלמה בנו לאמר
מלכים א 2 : 2 (ALEP)
ב אנכי הלך בדרך כל הארץ וחזקת והיית לאיש
מלכים א 2 : 3 (ALEP)
ג ושמרת את משמרת יהוה אלהיך ללכת בדרכיו לשמר חקתיו מצותיו ומשפטיו ועדותיו ככתוב בתורת משה--למען תשכיל את כל אשר תעשה ואת כל אשר תפנה שם
מלכים א 2 : 4 (ALEP)
ד למען יקים יהוה את דברו אשר דבר עלי לאמר אם ישמרו בניך את דרכם ללכת לפני באמת בכל לבבם ובכל נפשם לאמר--לא יכרת לך איש מעל כסא ישראל
מלכים א 2 : 5 (ALEP)
ה וגם אתה ידעת את אשר עשה לי יואב בן צרויה אשר עשה לשני שרי צבאות ישראל לאבנר בן נר ולעמשא בן יתר ויהרגם וישם דמי מלחמה בשלם ויתן דמי מלחמה בחגרתו אשר במתניו ובנעלו אשר ברגליו
מלכים א 2 : 6 (ALEP)
ו ועשית כחכמתך ולא תורד שיבתו בשלם שאל
מלכים א 2 : 7 (ALEP)
ז ולבני ברזלי הגלעדי תעשה חסד והיו באכלי שלחנך כי כן קרבו אלי בברחי מפני אבשלום אחיך
מלכים א 2 : 8 (ALEP)
ח והנה עמך שמעי בן גרא בן הימיני מבחרים והוא קללני קללה נמרצת ביום לכתי מחנים והוא ירד לקראתי הירדן ואשבע לו ביהוה לאמר אם אמיתך בחרב
מלכים א 2 : 9 (ALEP)
ט ועתה אל תנקהו כי איש חכם אתה וידעת את אשר תעשה לו והורדת את שיבתו בדם שאול
מלכים א 2 : 10 (ALEP)
י וישכב דוד עם אבתיו ויקבר בעיר דוד פ
מלכים א 2 : 11 (ALEP)
יא והימים אשר מלך דוד על ישראל ארבעים שנה בחברון מלך שבע שנים ובירושלם מלך שלשים ושלש שנים
מלכים א 2 : 12 (ALEP)
יב ושלמה--ישב על כסא דוד אביו ותכן מלכתו מאד ס
מלכים א 2 : 13 (ALEP)
יג ויבא אדניהו בן חגית אל בת שבע אם שלמה ותאמר השלום באך ויאמר שלום
מלכים א 2 : 14 (ALEP)
יד ויאמר דבר לי אליך ותאמר דבר
מלכים א 2 : 15 (ALEP)
טו ויאמר את ידעת כי לי היתה המלוכה ועלי שמו כל ישראל פניהם למלך ותסב המלוכה ותהי לאחי כי מיהוה היתה לו
מלכים א 2 : 16 (ALEP)
טז ועתה שאלה אחת אנכי שאל מאתך--אל תשבי את פני ותאמר אליו דבר
מלכים א 2 : 17 (ALEP)
יז ויאמר אמרי נא לשלמה המלך כי לא ישיב את פניך ויתן לי את אבישג השונמית לאשה
מלכים א 2 : 18 (ALEP)
יח ותאמר בת שבע טוב אנכי אדבר עליך אל המלך
מלכים א 2 : 19 (ALEP)
יט ותבא בת שבע אל המלך שלמה לדבר לו על אדניהו ויקם המלך לקראתה וישתחו לה וישב על כסאו וישם כסא לאם המלך ותשב לימינו
מלכים א 2 : 20 (ALEP)
כ ותאמר שאלה אחת קטנה אנכי שאלת מאתך--אל תשב את פני ויאמר לה המלך שאלי אמי כי לא אשיב את פניך
מלכים א 2 : 21 (ALEP)
כא ותאמר יתן את אבישג השנמית לאדניהו אחיך לאשה
מלכים א 2 : 22 (ALEP)
כב ויען המלך שלמה ויאמר לאמו ולמה את שאלת את אבישג השנמית לאדניהו ושאלי לו את המלוכה כי הוא אחי הגדול ממני ולו ולאביתר הכהן וליואב בן צרויה פ
מלכים א 2 : 23 (ALEP)
כג וישבע המלך שלמה ביהוה לאמר כה יעשה לי אלהים וכה יוסיף כי בנפשו דבר אדניהו את הדבר הזה
מלכים א 2 : 24 (ALEP)
כד ועתה חי יהוה אשר הכינני ויושיביני (ויושיבני) על כסא דוד אבי ואשר עשה לי בית כאשר דבר כי היום יומת אדניהו
מלכים א 2 : 25 (ALEP)
כה וישלח המלך שלמה ביד בניהו בן יהוידע ויפגע בו וימת ס
מלכים א 2 : 26 (ALEP)
כו ולאביתר הכהן אמר המלך ענתת לך על שדיך--כי איש מות אתה וביום הזה לא אמיתך כי נשאת את ארון אדני יהוה לפני דוד אבי וכי התענית בכל אשר התענה אבי
מלכים א 2 : 27 (ALEP)
כז ויגרש שלמה את אביתר מהיות כהן ליהוה למלא את דבר יהוה אשר דבר על בית עלי בשלה פ
מלכים א 2 : 28 (ALEP)
כח והשמעה באה עד יואב כי יואב נטה אחרי אדניה ואחרי אבשלום לא נטה וינס יואב אל אהל יהוה ויחזק בקרנות המזבח
מלכים א 2 : 29 (ALEP)
כט ויגד למלך שלמה כי נס יואב אל אהל יהוה והנה אצל המזבח וישלח שלמה את בניהו בן יהוידע לאמר--לך פגע בו
מלכים א 2 : 30 (ALEP)
ל ויבא בניהו אל אהל יהוה ויאמר אליו כה אמר המלך צא ויאמר לא כי פה אמות וישב בניהו את המלך דבר לאמר כה דבר יואב וכה ענני
מלכים א 2 : 31 (ALEP)
לא ויאמר לו המלך עשה כאשר דבר ופגע בו וקברתו והסירת דמי חנם אשר שפך יואב מעלי ומעל בית אבי
מלכים א 2 : 32 (ALEP)
לב והשיב יהוה את דמו על ראשו אשר פגע בשני אנשים צדקים וטבים ממנו ויהרגם בחרב--ואבי דוד לא ידע את אבנר בן נר שר צבא ישראל ואת עמשא בן יתר שר צבא יהודה
מלכים א 2 : 33 (ALEP)
לג ושבו דמיהם בראש יואב ובראש זרעו לעלם ולדוד ולזרעו ולביתו ולכסאו יהיה שלום עד עולם--מעם יהוה
מלכים א 2 : 34 (ALEP)
לד ויעל בניהו בן יהוידע ויפגע בו וימתהו ויקבר בביתו במדבר
מלכים א 2 : 35 (ALEP)
לה ויתן המלך את בניהו בן יהוידע תחתיו--על הצבא ואת צדוק הכהן נתן המלך תחת אביתר
מלכים א 2 : 36 (ALEP)
לו וישלח המלך ויקרא לשמעי ויאמר לו בנה לך בית בירושלם וישבת שם ולא תצא משם אנה ואנה
מלכים א 2 : 37 (ALEP)
לז והיה ביום צאתך ועברת את נחל קדרון--ידע תדע כי מות תמות דמך יהיה בראשך
מלכים א 2 : 38 (ALEP)
לח ויאמר שמעי למלך טוב הדבר כאשר דבר אדני המלך כן יעשה עבדך וישב שמעי בירושלם ימים רבים ס
מלכים א 2 : 39 (ALEP)
לט ויהי מקץ שלש שנים ויברחו שני עבדים לשמעי אל אכיש בן מעכה מלך גת ויגידו לשמעי לאמר הנה עבדיך בגת
מלכים א 2 : 40 (ALEP)
מ ויקם שמעי ויחבש את חמרו וילך גתה אל אכיש לבקש את עבדיו וילך שמעי ויבא את עבדיו מגת ס
מלכים א 2 : 41 (ALEP)
מא ויגד לשלמה כי הלך שמעי מירושלם גת וישב
מלכים א 2 : 42 (ALEP)
מב וישלח המלך ויקרא לשמעי ויאמר אליו הלוא השבעתיך ביהוה ואעד בך לאמר ביום צאתך והלכת אנה ואנה ידע תדע כי מות תמות ותאמר אלי טוב הדבר שמעתי
מלכים א 2 : 43 (ALEP)
מג ומדוע--לא שמרת את שבעת יהוה ואת המצוה אשר צויתי עליך
מלכים א 2 : 44 (ALEP)
מד ויאמר המלך אל שמעי אתה ידעת את כל הרעה אשר ידע לבבך אשר עשית לדוד אבי והשיב יהוה את רעתך בראשך
מלכים א 2 : 45 (ALEP)
מה והמלך שלמה ברוך וכסא דוד יהיה נכון לפני יהוה--עד עולם
מלכים א 2 : 46 (ALEP)
מו ויצו המלך את בניהו בן יהוידע ויצא ויפגע בו וימת והממלכה נכונה ביד שלמה
❮
❯