מלכים א 14 : 1 (ALEP)
א בעת ההיא חלה אביה בן ירבעם
מלכים א 14 : 2 (ALEP)
ב ויאמר ירבעם לאשתו קומי נא והשתנית ולא ידעו כי אתי (את) אשת ירבעם והלכת שלה הנה שם אחיה הנביא--הוא דבר עלי למלך על העם הזה
מלכים א 14 : 3 (ALEP)
ג ולקחת בידך עשרה לחם ונקדים ובקבק דבש--ובאת אליו הוא יגיד לך מה יהיה לנער
מלכים א 14 : 4 (ALEP)
ד ותעש כן אשת ירבעם ותקם ותלך שלה ותבא בית אחיה ואחיהו לא יכל לראות כי קמו עיניו משיבו פ
מלכים א 14 : 5 (ALEP)
ה ויהוה אמר אל אחיהו הנה אשת ירבעם באה לדרש דבר מעמך אל בנה כי חלה הוא--כזה וכזה תדבר אליה ויהי כבאה והיא מתנכרה
מלכים א 14 : 6 (ALEP)
ו ויהי כשמע אחיהו את קול רגליה באה בפתח ויאמר באי אשת ירבעם למה זה את מתנכרה ואנכי שלוח אליך קשה
מלכים א 14 : 7 (ALEP)
ז לכי אמרי לירבעם כה אמר יהוה אלהי ישראל יען אשר הרמתיך מתוך העם ואתנך נגיד על עמי ישראל
מלכים א 14 : 8 (ALEP)
ח ואקרע את הממלכה מבית דוד ואתנה לך ולא היית כעבדי דוד אשר שמר מצותי ואשר הלך אחרי בכל לבבו לעשות רק הישר בעיני
מלכים א 14 : 9 (ALEP)
ט ותרע לעשות מכל אשר היו לפניך ותלך ותעשה לך אלהים אחרים ומסכות להכעיסני ואתי השלכת אחרי גוך
מלכים א 14 : 10 (ALEP)
י לכן הנני מביא רעה אל בית ירבעם והכרתי לירבעם משתין בקיר עצור ועזוב בישראל ובערתי אחרי בית ירבעם כאשר יבער הגלל עד תמו
מלכים א 14 : 11 (ALEP)
יא המת לירבעם בעיר יאכלו הכלבים והמת בשדה יאכלו עוף השמים כי יהוה דבר
מלכים א 14 : 12 (ALEP)
יב ואת קומי לכי לביתך בבאה רגליך העירה ומת הילד
מלכים א 14 : 13 (ALEP)
יג וספדו לו כל ישראל וקברו אתו--כי זה לבדו יבא לירבעם אל קבר יען נמצא בו דבר טוב אל יהוה אלהי ישראל--בבית ירבעם
מלכים א 14 : 14 (ALEP)
יד והקים יהוה לו מלך על ישראל אשר יכרית את בית ירבעם זה היום ומה גם עתה
מלכים א 14 : 15 (ALEP)
טו והכה יהוה את ישראל כאשר ינוד הקנה במים ונתש את ישראל מעל האדמה הטובה הזאת אשר נתן לאבותיהם וזרם מעבר לנהר יען אשר עשו את אשריהם--מכעיסים את יהוה
מלכים א 14 : 16 (ALEP)
טז ויתן את ישראל--בגלל חטאות ירבעם אשר חטא ואשר החטיא את ישראל
מלכים א 14 : 17 (ALEP)
יז ותקם אשת ירבעם ותלך ותבא תרצתה היא באה בסף הבית והנער מת
מלכים א 14 : 18 (ALEP)
יח ויקברו אתו ויספדו לו כל ישראל כדבר יהוה אשר דבר ביד עבדו אחיהו הנביא
מלכים א 14 : 19 (ALEP)
יט ויתר דברי ירבעם אשר נלחם ואשר מלך הנם כתובים על ספר דברי הימים--למלכי ישראל
מלכים א 14 : 20 (ALEP)
כ והימים אשר מלך ירבעם עשרים ושתים שנה וישכב עם אבתיו וימלך נדב בנו תחתיו פ
מלכים א 14 : 21 (ALEP)
כא ורחבעם בן שלמה מלך ביהודה בן ארבעים ואחת שנה רחבעם במלכו ושבע עשרה שנה מלך בירושלם העיר אשר בחר יהוה לשום את שמו שם מכל שבטי ישראל ושם אמו נעמה העמנית
מלכים א 14 : 22 (ALEP)
כב ויעש יהודה הרע בעיני יהוה ויקנאו אתו מכל אשר עשו אבתם בחטאתם אשר חטאו
מלכים א 14 : 23 (ALEP)
כג ויבנו גם המה להם במות ומצבות ואשרים על כל גבעה גבהה ותחת כל עץ רענן
מלכים א 14 : 24 (ALEP)
כד וגם קדש היה בארץ עשו ככל התועבת הגוים אשר הוריש יהוה מפני בני ישראל פ
מלכים א 14 : 25 (ALEP)
כה ויהי בשנה החמישית למלך רחבעם עלה שושק (שישק) מלך מצרים על ירושלם
מלכים א 14 : 26 (ALEP)
כו ויקח את אצרות בית יהוה ואת אוצרות בית המלך ואת הכל לקח ויקח את כל מגני הזהב אשר עשה שלמה
מלכים א 14 : 27 (ALEP)
כז ויעש המלך רחבעם תחתם מגני נחשת והפקיד על יד שרי הרצים השמרים פתח בית המלך
מלכים א 14 : 28 (ALEP)
כח ויהי מדי בא המלך בית יהוה--ישאום הרצים והשיבום אל תא הרצים
מלכים א 14 : 29 (ALEP)
כט ויתר דברי רחבעם וכל אשר עשה הלא המה כתובים על ספר דברי הימים--למלכי יהודה
מלכים א 14 : 30 (ALEP)
ל ומלחמה היתה בין רחבעם ובין ירבעם כל הימים
מלכים א 14 : 31 (ALEP)
לא וישכב רחבעם עם אבתיו ויקבר עם אבתיו בעיר דוד ושם אמו נעמה העמנית וימלך אבים בנו תחתיו פ
❮
❯