מלכים א 12 : 1 (ALEP)
א וילך רחבעם שכם כי שכם בא כל ישראל להמליך אתו
מלכים א 12 : 2 (ALEP)
ב ויהי כשמע ירבעם בן נבט והוא עודנו במצרים אשר ברח מפני המלך שלמה וישב ירבעם במצרים
מלכים א 12 : 3 (ALEP)
ג וישלחו ויקראו לו ויבאו (ויבא) ירבעם וכל קהל ישראל וידברו אל רחבעם לאמר
מלכים א 12 : 4 (ALEP)
ד אביך הקשה את עלנו ואתה עתה הקל מעבדת אביך הקשה ומעלו הכבד אשר נתן עלינו--ונעבדך
מלכים א 12 : 5 (ALEP)
ה ויאמר אליהם לכו עד שלשה ימים--ושובו אלי וילכו העם
מלכים א 12 : 6 (ALEP)
ו ויועץ המלך רחבעם את הזקנים אשר היו עמדים את פני שלמה אביו בהיתו חי לאמר איך אתם נועצים להשיב את העם הזה דבר
מלכים א 12 : 7 (ALEP)
ז וידבר (וידברו) אליו לאמר אם היום תהיה עבד לעם הזה ועבדתם ועניתם ודברת אליהם דברים טובים--והיו לך עבדים כל הימים
מלכים א 12 : 8 (ALEP)
ח ויעזב את עצת הזקנים אשר יעצהו ויועץ את הילדים אשר גדלו אתו אשר העמדים לפניו
מלכים א 12 : 9 (ALEP)
ט ויאמר אליהם מה אתם נועצים ונשיב דבר את העם הזה--אשר דברו אלי לאמר הקל מן העל אשר נתן אביך עלינו
מלכים א 12 : 10 (ALEP)
י וידברו אליו הילדים אשר גדלו אתו לאמר כה תאמר לעם הזה אשר דברו אליך לאמר אביך הכביד את עלנו ואתה הקל מעלינו כה תדבר אליהם קטני עבה ממתני אבי
מלכים א 12 : 11 (ALEP)
יא ועתה אבי העמיס עליכם על כבד ואני אוסיף על עלכם אבי יסר אתכם בשוטים ואני איסר אתכם בעקרבים
מלכים א 12 : 12 (ALEP)
יב ויבו ירבעם וכל העם אל רחבעם ביום השלישי כאשר דבר המלך לאמר שובו אלי ביום השלישי
מלכים א 12 : 13 (ALEP)
יג ויען המלך את העם קשה ויעזב את עצת הזקנים אשר יעצהו
מלכים א 12 : 14 (ALEP)
יד וידבר אליהם כעצת הילדים לאמר אבי הכביד את עלכם ואני אסיף על עלכם אבי יסר אתכם בשוטים ואני איסר אתכם בעקרבים
מלכים א 12 : 15 (ALEP)
טו ולא שמע המלך אל העם כי היתה סבה מעם יהוה למען הקים את דברו אשר דבר יהוה ביד אחיה השילני אל ירבעם בן נבט
מלכים א 12 : 16 (ALEP)
טז וירא כל ישראל כי לא שמע המלך אלהם וישבו העם את המלך דבר לאמר מה לנו חלק בדוד ולא נחלה בבן ישי לאהליך ישראל עתה ראה ביתך דוד וילך ישראל לאהליו
מלכים א 12 : 17 (ALEP)
יז ובני ישראל הישבים בערי יהודה--וימלך עליהם רחבעם פ
מלכים א 12 : 18 (ALEP)
יח וישלח המלך רחבעם את אדרם אשר על המס וירגמו כל ישראל בו אבן וימת והמלך רחבעם התאמץ לעלות במרכבה לנוס ירושלם
מלכים א 12 : 19 (ALEP)
יט ויפשעו ישראל בבית דוד עד היום הזה ס
מלכים א 12 : 20 (ALEP)
כ ויהי כשמע כל ישראל כי שב ירבעם וישלחו ויקראו אתו אל העדה וימליכו אתו על כל ישראל לא היה אחרי בית דוד זולתי שבט יהודה לבדו
מלכים א 12 : 21 (ALEP)
כא ויבאו (ויבא) רחבעם ירושלם ויקהל את כל בית יהודה ואת שבט בנימן מאה ושמנים אלף בחור עשה מלחמה--להלחם עם בית ישראל להשיב את המלוכה לרחבעם בן שלמה פ
מלכים א 12 : 22 (ALEP)
כב ויהי דבר האלהים אל שמעיה איש האלהים לאמר
מלכים א 12 : 23 (ALEP)
כג אמר אל רחבעם בן שלמה מלך יהודה ואל כל בית יהודה ובנימין ויתר העם לאמר
מלכים א 12 : 24 (ALEP)
כד כה אמר יהוה לא תעלו ולא תלחמון עם אחיכם בני ישראל שובו איש לביתו--כי מאתי נהיה הדבר הזה וישמעו את דבר יהוה וישבו ללכת כדבר יהוה ס
מלכים א 12 : 25 (ALEP)
כה ויבן ירבעם את שכם בהר אפרים וישב בה ויצא משם ויבן את פנואל
מלכים א 12 : 26 (ALEP)
כו ויאמר ירבעם בלבו עתה תשוב הממלכה לבית דוד
מלכים א 12 : 27 (ALEP)
כז אם יעלה העם הזה לעשות זבחים בבית יהוה בירושלם ושב לב העם הזה אל אדניהם אל רחבעם מלך יהודה והרגני ושבו אל רחבעם מלך יהודה
מלכים א 12 : 28 (ALEP)
כח ויועץ המלך--ויעש שני עגלי זהב ויאמר אלהם רב לכם מעלות ירושלם--הנה אלהיך ישראל אשר העלוך מארץ מצרים
מלכים א 12 : 29 (ALEP)
כט וישם את האחד בבית אל ואת האחד נתן בדן
מלכים א 12 : 30 (ALEP)
ל ויהי הדבר הזה לחטאת וילכו העם לפני האחד עד דן
מלכים א 12 : 31 (ALEP)
לא ויעש את בית במות ויעש כהנים מקצות העם אשר לא היו מבני לוי
מלכים א 12 : 32 (ALEP)
לב ויעש ירבעם חג בחדש השמיני בחמשה עשר יום לחדש כחג אשר ביהודה ויעל על המזבח--כן עשה בבית אל לזבח לעגלים אשר עשה והעמיד בבית אל את כהני הבמות אשר עשה
מלכים א 12 : 33 (ALEP)
לג ויעל על המזבח אשר עשה בבית אל בחמשה עשר יום בחדש השמיני--בחדש אשר בדא מלבד (מלבו) ויעש חג לבני ישראל ויעל על המזבח להקטיר פ
❮
❯