דברי הימים א 29 : 1 (ALEP)
א ויאמר דויד המלך לכל הקהל שלמה בני אחד בחר בו אלהים נער ורך והמלאכה גדולה--כי לא לאדם הבירה כי ליהוה אלהים
דברי הימים א 29 : 2 (ALEP)
ב וככל כחי הכינותי לבית אלהי הזהב לזהב והכסף לכסף והנחשת לנחשת הברזל לברזל והעצים לעצים אבני שהם ומלואים אבני פוך ורקמה וכל אבן יקרה ואבני שיש--לרב
דברי הימים א 29 : 3 (ALEP)
ג ועוד ברצותי בבית אלהי יש לי סגלה זהב וכסף נתתי לבית אלהי למעלה מכל הכינותי לבית הקדש
דברי הימים א 29 : 4 (ALEP)
ד שלשת אלפים ככרי זהב מזהב אופיר ושבעת אלפים ככר כסף מזקק לטוח קירות הבתים
דברי הימים א 29 : 5 (ALEP)
ה לזהב לזהב ולכסף לכסף ולכל מלאכה ביד חרשים ומי מתנדב למלאות ידו היום ליהוה
דברי הימים א 29 : 6 (ALEP)
ו ויתנדבו שרי האבות ושרי שבטי ישראל ושרי האלפים והמאות ולשרי מלאכת המלך
דברי הימים א 29 : 7 (ALEP)
ז ויתנו לעבודת בית האלהים זהב ככרים חמשת אלפים ואדרכנים רבו וכסף ככרים עשרת אלפים ונחשת רבו ושמונת אלפים ככרים וברזל מאה אלף ככרים
דברי הימים א 29 : 8 (ALEP)
ח והנמצא אתו אבנים נתנו לאוצר בית יהוה--על יד יחיאל הגרשני
דברי הימים א 29 : 9 (ALEP)
ט וישמחו העם על התנדבם כי בלב שלם התנדבו ליהוה וגם דויד המלך שמח שמחה גדולה פ
דברי הימים א 29 : 10 (ALEP)
י ויברך דויד את יהוה לעיני כל הקהל ויאמר דויד ברוך אתה יהוה אלהי ישראל אבינו מעולם ועד עולם
דברי הימים א 29 : 11 (ALEP)
יא לך יהוה הגדלה והגבורה והתפארת והנצח וההוד כי כל בשמים ובארץ לך יהוה הממלכה והמתנשא לכל לראש
דברי הימים א 29 : 12 (ALEP)
יב והעשר והכבוד מלפניך ואתה מושל בכל ובידך כח וגבורה ובידך לגדל ולחזק לכל
דברי הימים א 29 : 13 (ALEP)
יג ועתה אלהינו מודים אנחנו לך ומהללים לשם תפארתך
דברי הימים א 29 : 14 (ALEP)
יד וכי מי אני ומי עמי כי נעצר כח להתנדב כזאת כי ממך הכל ומידך נתנו לך
דברי הימים א 29 : 15 (ALEP)
טו כי גרים אנחנו לפניך ותושבים ככל אבתינו כצל ימינו על הארץ ואין מקוה
דברי הימים א 29 : 16 (ALEP)
טז יהוה אלהינו--כל ההמון הזה אשר הכיננו לבנות לך בית לשם קדשך מידך היא (הוא) ולך הכל
דברי הימים א 29 : 17 (ALEP)
יז וידעתי אלהי--כי אתה בחן לבב ומישרים תרצה אני בישר לבבי התנדבתי כל אלה ועתה עמך הנמצאו פה ראיתי בשמחה להתנדב לך
דברי הימים א 29 : 18 (ALEP)
יח יהוה אלהי אברהם יצחק וישראל אבתינו שמרה זאת לעולם ליצר מחשבות לבב עמך והכן לבבם אליך
דברי הימים א 29 : 19 (ALEP)
יט ולשלמה בני תן לבב שלם לשמור מצותיך עדותיך וחקיך ולעשות הכל ולבנות הבירה אשר הכינותי פ
דברי הימים א 29 : 20 (ALEP)
כ ויאמר דויד לכל הקהל ברכו נא את יהוה אלהיכם ויברכו כל הקהל ליהוה אלהי אבתיהם ויקדו וישתחוו ליהוה ולמלך
דברי הימים א 29 : 21 (ALEP)
כא ויזבחו ליהוה זבחים ויעלו עלות ליהוה למחרת היום ההוא--פרים אלף אלים אלף כבשים אלף ונסכיהם וזבחים לרב לכל ישראל
דברי הימים א 29 : 22 (ALEP)
כב ויאכלו וישתו לפני יהוה ביום ההוא--בשמחה גדולה וימליכו שנית לשלמה בן דויד וימשחו ליהוה לנגיד ולצדוק לכהן
דברי הימים א 29 : 23 (ALEP)
כג וישב שלמה על כסא יהוה למלך תחת דויד אביו--ויצלח וישמעו אליו כל ישראל
דברי הימים א 29 : 24 (ALEP)
כד וכל השרים והגברים וגם כל בני המלך דויד--נתנו יד תחת שלמה המלך
דברי הימים א 29 : 25 (ALEP)
כה ויגדל יהוה את שלמה למעלה לעיני כל ישראל ויתן עליו הוד מלכות אשר לא היה על כל מלך לפניו על ישראל פ
דברי הימים א 29 : 26 (ALEP)
כו ודויד בן ישי מלך על כל ישראל
דברי הימים א 29 : 27 (ALEP)
כז והימים אשר מלך על ישראל--ארבעים שנה בחברון מלך שבע שנים ובירושלם מלך שלשים ושלוש
דברי הימים א 29 : 28 (ALEP)
כח וימת בשיבה טובה שבע ימים עשר וכבוד וימלך שלמה בנו תחתיו
דברי הימים א 29 : 29 (ALEP)
כט ודברי דויד המלך הראשנים והאחרנים--הנם כתובים על דברי שמואל הראה ועל דברי נתן הנביא ועל דברי גד החזה
דברי הימים א 29 : 30 (ALEP)
ל עם כל מלכותו וגבורתו והעתים אשר עברו עליו ועל ישראל ועל כל ממלכות הארצות פ
❮
❯