דברי הימים א 22 : 1 (ALEP)
א ויאמר דויד--זה הוא בית יהוה האלהים וזה מזבח לעלה לישראל {פ}
דברי הימים א 22 : 2 (ALEP)
ב ויאמר דויד--לכנוס את הגרים אשר בארץ ישראל ויעמד חצבים לחצוב אבני גזית לבנות בית האלהים
דברי הימים א 22 : 3 (ALEP)
ג וברזל לרב למסמרים לדלתות השערים ולמחברות--הכין דויד ונחשת לרב אין משקל
דברי הימים א 22 : 4 (ALEP)
ד ועצי ארזים לאין מספר כי הביאו הצידנים והצרים עצי ארזים לרב--לדויד {פ}
דברי הימים א 22 : 5 (ALEP)
ה ויאמר דויד שלמה בני נער ורך והבית לבנות ליהוה להגדיל למעלה לשם ולתפארת לכל הארצות אכינה נא לו ויכן דויד לרב לפני מותו
דברי הימים א 22 : 6 (ALEP)
ו ויקרא לשלמה בנו ויצוהו לבנות בית ליהוה אלהי ישראל {ס}
דברי הימים א 22 : 7 (ALEP)
ז ויאמר דויד לשלמה בנו (בני)--אני היה עם לבבי לבנות בית לשם יהוה אלהי
דברי הימים א 22 : 8 (ALEP)
ח ויהי עלי דבר יהוה לאמר דם לרב שפכת ומלחמות גדלות עשית לא תבנה בית לשמי--כי דמים רבים שפכת ארצה לפני
דברי הימים א 22 : 9 (ALEP)
ט הנה בן נולד לך הוא יהיה איש מנוחה והניחותי לו מכל אויביו מסביב כי שלמה יהיה שמו ושלום ושקט אתן על ישראל בימיו
דברי הימים א 22 : 10 (ALEP)
י הוא יבנה בית לשמי והוא יהיה לי לבן ואני לו לאב והכינותי כסא מלכותו על ישראל--עד עולם
דברי הימים א 22 : 11 (ALEP)
יא עתה בני יהי יהוה עמך והצלחת ובנית בית יהוה אלהיך כאשר דבר עליך
דברי הימים א 22 : 12 (ALEP)
יב אך יתן לך יהוה שכל ובינה ויצוך על ישראל ולשמור את תורת יהוה אלהיך
דברי הימים א 22 : 13 (ALEP)
יג אז תצליח--אם תשמור לעשות את החקים ואת המשפטים אשר צוה יהוה את משה על ישראל חזק ואמץ אל תירא ואל תחת
דברי הימים א 22 : 14 (ALEP)
יד והנה בעניי הכינותי לבית יהוה זהב ככרים מאה אלף וכסף אלף אלפים ככרים ולנחשת ולברזל אין משקל כי לרב היה ועצים ואבנים הכינותי ועליהם תוסיף
דברי הימים א 22 : 15 (ALEP)
טו ועמך לרב עשי מלאכה--חצבים וחרשי אבן ועץ וכל חכם בכל מלאכה
דברי הימים א 22 : 16 (ALEP)
טז לזהב לכסף ולנחשת ולברזל אין מספר קום ועשה ויהי יהוה עמך
דברי הימים א 22 : 17 (ALEP)
יז ויצו דויד לכל שרי ישראל לעזר לשלמה בנו {ס}
דברי הימים א 22 : 18 (ALEP)
יח הלא יהוה אלהיכם עמכם והניח לכם מסביב כי נתן בידי את ישבי הארץ ונכבשה הארץ לפני יהוה ולפני עמו
דברי הימים א 22 : 19 (ALEP)
יט עתה תנו לבבכם ונפשכם לדרוש ליהוה אלהיכם וקומו ובנו את מקדש יהוה האלהים להביא את ארון ברית יהוה וכלי קדש האלהים לבית הנבנה לשם יהוה {פ}
❮
❯