דברי הימים א 21 : 1 (ALEP)
א ויעמד שטן על ישראל ויסת את דויד למנות את ישראל
דברי הימים א 21 : 2 (ALEP)
ב ויאמר דויד אל יואב ואל שרי העם לכו ספרו את ישראל מבאר שבע ועד דן והביאו אלי ואדעה את מספרם
דברי הימים א 21 : 3 (ALEP)
ג ויאמר יואב יוסף יהוה על עמו כהם מאה פעמים--הלא אדני המלך כלם לאדני לעבדים למה יבקש זאת אדני למה יהיה לאשמה לישראל
דברי הימים א 21 : 4 (ALEP)
ד ודבר המלך חזק על יואב ויצא יואב ויתהלך בכל ישראל ויבא ירושלם
דברי הימים א 21 : 5 (ALEP)
ה ויתן יואב את מספר מפקד העם אל דויד ויהי כל ישראל אלף אלפים ומאה אלף איש שלף חרב ויהודה ארבע מאות ושבעים אלף איש שלף חרב
דברי הימים א 21 : 6 (ALEP)
ו ולוי ובנימן לא פקד בתוכם כי נתעב דבר המלך את יואב
דברי הימים א 21 : 7 (ALEP)
ז וירע בעיני האלהים על הדבר הזה ויך את ישראל ס
דברי הימים א 21 : 8 (ALEP)
ח ויאמר דויד אל האלהים חטאתי מאד אשר עשיתי את הדבר הזה ועתה העבר נא את עוון עבדך כי נסכלתי מאד פ
דברי הימים א 21 : 9 (ALEP)
ט וידבר יהוה אל גד חזה דויד לאמר
דברי הימים א 21 : 10 (ALEP)
י לך ודברת אל דויד לאמר כה אמר יהוה שלוש אני נטה עליך בחר לך אחת מהנה ואעשה לך
דברי הימים א 21 : 11 (ALEP)
יא ויבא גד אל דויד ויאמר לו כה אמר יהוה קבל לך
דברי הימים א 21 : 12 (ALEP)
יב אם שלוש שנים רעב ואם שלשה חדשים נספה מפני צריך וחרב אויביך למשגת ואם שלשת ימים חרב יהוה ודבר בארץ ומלאך יהוה משחית בכל גבול ישראל ועתה ראה מה אשיב את שלחי דבר ס
דברי הימים א 21 : 13 (ALEP)
יג ויאמר דויד אל גד צר לי מאד אפלה נא ביד יהוה כי רבים רחמיו מאד וביד אדם אל אפל
דברי הימים א 21 : 14 (ALEP)
יד ויתן יהוה דבר בישראל ויפל מישראל שבעים אלף איש
דברי הימים א 21 : 15 (ALEP)
טו וישלח האלהים מלאך לירושלם להשחיתה וכהשחית ראה יהוה וינחם על הרעה ויאמר למלאך המשחית רב עתה הרף ידך ומלאך יהוה עמד עם גרן ארנן היבוסי ס
דברי הימים א 21 : 16 (ALEP)
טז וישא דויד את עיניו וירא את מלאך יהוה עמד בין הארץ ובין השמים וחרבו שלופה בידו נטויה על ירושלם ויפל דויד והזקנים מכסים בשקים על פניהם
דברי הימים א 21 : 17 (ALEP)
יז ויאמר דויד אל האלהים הלא אני אמרתי למנות בעם ואני הוא אשר חטאתי והרע הרעותי ואלה הצאן מה עשו יהוה אלהי תהי נא ידך בי ובבית אבי ובעמך לא למגפה ס
דברי הימים א 21 : 18 (ALEP)
יח ומלאך יהוה אמר אל גד לאמר לדויד כי יעלה דויד להקים מזבח ליהוה בגרן ארנן היבסי
דברי הימים א 21 : 19 (ALEP)
יט ויעל דויד בדבר גד אשר דבר בשם יהוה
דברי הימים א 21 : 20 (ALEP)
כ וישב ארנן וירא את המלאך וארבעת בניו עמו מתחבאים וארנן דש חטים
דברי הימים א 21 : 21 (ALEP)
כא ויבא דויד עד ארנן ויבט ארנן וירא את דויד ויצא מן הגרן וישתחו לדויד אפים ארצה
דברי הימים א 21 : 22 (ALEP)
כב ויאמר דויד אל ארנן תנה לי מקום הגרן ואבנה בו מזבח ליהוה בכסף מלא תנהו לי ותעצר המגפה מעל העם
דברי הימים א 21 : 23 (ALEP)
כג ויאמר ארנן אל דויד קח לך ויעש אדני המלך הטוב בעיניו ראה נתתי הבקר לעלות והמורגים לעצים והחטים למנחה--הכל נתתי
דברי הימים א 21 : 24 (ALEP)
כד ויאמר המלך דויד לארנן לא כי קנה אקנה בכסף מלא כי לא אשא אשר לך ליהוה והעלות עולה חנם
דברי הימים א 21 : 25 (ALEP)
כה ויתן דויד לארנן במקום שקלי זהב משקל שש מאות
דברי הימים א 21 : 26 (ALEP)
כו ויבן שם דויד מזבח ליהוה ויעל עלות ושלמים ויקרא אל יהוה ויענהו באש מן השמים על מזבח העלה ס
דברי הימים א 21 : 27 (ALEP)
כז ויאמר יהוה למלאך וישב חרבו אל נדנה
דברי הימים א 21 : 28 (ALEP)
כח בעת ההיא--בראות דויד כי ענהו יהוה בגרן ארנן היבוסי ויזבח שם
דברי הימים א 21 : 29 (ALEP)
כט ומשכן יהוה אשר עשה משה במדבר ומזבח העולה--בעת ההיא בבמה בגבעון
דברי הימים א 21 : 30 (ALEP)
ל ולא יכל דויד ללכת לפניו לדרש אלהים כי נבעת--מפני חרב מלאך יהוה ס
❮
❯