דברי הימים א 20 : 1 (ALEP)
א ויהי לעת תשובת השנה לעת צאת המלכים וינהג יואב את חיל הצבא וישחת את ארץ בני עמון ויבא ויצר את רבה ודויד ישב בירושלם ויך יואב את רבה ויהרסה
דברי הימים א 20 : 2 (ALEP)
ב ויקח דויד את עטרת מלכם מעל ראשו וימצאה משקל ככר זהב ובה אבן יקרה ותהי על ראש דויד ושלל העיר הוציא הרבה מאד
דברי הימים א 20 : 3 (ALEP)
ג ואת העם אשר בה הוציא וישר במגרה ובחריצי הברזל ובמגרות וכן יעשה דויד לכל ערי בני עמון וישב דויד וכל העם ירושלם ס
דברי הימים א 20 : 4 (ALEP)
ד ויהי אחרי כן ותעמד מלחמה בגזר עם פלשתים אז הכה סבכי החשתי את ספי מילידי הרפאים--ויכנעו
דברי הימים א 20 : 5 (ALEP)
ה ותהי עוד מלחמה את פלשתים ויך אלחנן בן יעור (יעיר) את לחמי אחי גלית הגתי--ועץ חניתו כמנור ארגים ס
דברי הימים א 20 : 6 (ALEP)
ו ותהי עוד מלחמה בגת ויהי איש מדה ואצבעתיו שש ושש עשרים וארבע וגם הוא נולד להרפא
דברי הימים א 20 : 7 (ALEP)
ז ויחרף את ישראל ויכהו יהונתן בן שמעא אחי דויד
דברי הימים א 20 : 8 (ALEP)
ח אל נולדו להרפא בגת ויפלו ביד דויד וביד עבדיו פ
❮
❯