דברי הימים א 17 : 1 (ALEP)
א ויהי כאשר ישב דויד בביתו ויאמר דויד אל נתן הנביא הנה אנכי יושב בבית הארזים וארון ברית יהוה תחת יריעות
דברי הימים א 17 : 2 (ALEP)
ב ויאמר נתן אל דויד כל אשר בלבבך עשה כי האלהים עמך ס
דברי הימים א 17 : 3 (ALEP)
ג ויהי בלילה ההוא ויהי דבר אלהים אל נתן לאמר
דברי הימים א 17 : 4 (ALEP)
ד לך ואמרת אל דויד עבדי כה אמר יהוה לא אתה תבנה לי הבית לשבת
דברי הימים א 17 : 5 (ALEP)
ה כי לא ישבתי בבית מן היום אשר העליתי את ישראל עד היום הזה ואהיה מאהל אל אהל וממשכן
דברי הימים א 17 : 6 (ALEP)
ו בכל אשר התהלכתי בכל ישראל הדבר דברתי את אחד שפטי ישראל אשר צויתי לרעות את עמי לאמר למה לא בניתם לי בית ארזים
דברי הימים א 17 : 7 (ALEP)
ז ועתה כה תאמר לעבדי לדויד ס כה אמר יהוה צבאות אני לקחתיך מן הנוה מן אחרי הצאן--להיות נגיד על עמי ישראל
דברי הימים א 17 : 8 (ALEP)
ח ואהיה עמך בכל אשר הלכת ואכרית את כל אויביך מפניך ועשיתי לך שם כשם הגדולים אשר בארץ
דברי הימים א 17 : 9 (ALEP)
ט ושמתי מקום לעמי ישראל ונטעתיהו ושכן תחתיו ולא ירגז עוד ולא יוסיפו בני עולה לבלתו כאשר בראשונה
דברי הימים א 17 : 10 (ALEP)
י ולמימים אשר צויתי שפטים על עמי ישראל והכנעתי את כל אויביך ואגד לך ובית יבנה לך יהוה
דברי הימים א 17 : 11 (ALEP)
יא והיה כי מלאו ימיך ללכת עם אבתיך והקימותי את זרעך אחריך אשר יהיה מבניך והכינותי את מלכותו
דברי הימים א 17 : 12 (ALEP)
יב הוא יבנה לי בית וכננתי את כסאו עד עולם
דברי הימים א 17 : 13 (ALEP)
יג אני אהיה לו לאב והוא יהיה לי לבן וחסדי לא אסיר מעמו כאשר הסירותי מאשר היה לפניך
דברי הימים א 17 : 14 (ALEP)
יד והעמדתיהו בביתי ובמלכותי עד העולם וכסאו יהיה נכון עד עולם
דברי הימים א 17 : 15 (ALEP)
טו ככל הדברים האלה וככל החזון הזה--כן דבר נתן אל דויד פ
דברי הימים א 17 : 16 (ALEP)
טז ויבא המלך דויד וישב לפני יהוה ויאמר מי אני יהוה אלהים ומי ביתי כי הביאתני עד הלם
דברי הימים א 17 : 17 (ALEP)
יז ותקטן זאת בעיניך אלהים ותדבר על בית עבדך למרחוק וראיתני כתור האדם המעלה--יהוה אלהים
דברי הימים א 17 : 18 (ALEP)
יח מה יוסיף עוד דויד אליך לכבוד את עבדך ואתה את עבדך ידעת
דברי הימים א 17 : 19 (ALEP)
יט יהוה--בעבור עבדך וכלבך עשית את כל הגדולה הזאת להדיע את כל הגדלות
דברי הימים א 17 : 20 (ALEP)
כ יהוה אין כמוך ואין אלהים זולתך בכל אשר שמענו באזנינו
דברי הימים א 17 : 21 (ALEP)
כא ומי כעמך ישראל גוי אחד בארץ אשר הלך האלהים לפדות לו עם לשום לך שם גדלות ונראות--לגרש מפני עמך אשר פדית ממצרים גוים
דברי הימים א 17 : 22 (ALEP)
כב ותתן את עמך ישראל לך לעם--עד עולם ואתה יהוה היית להם לאלהים
דברי הימים א 17 : 23 (ALEP)
כג ועתה יהוה--הדבר אשר דברת על עבדך ועל ביתו יאמן עד עולם ועשה כאשר דברת
דברי הימים א 17 : 24 (ALEP)
כד ויאמן ויגדל שמך עד עולם לאמר--יהוה צבאות אלהי ישראל אלהים לישראל ובית דויד עבדך נכון לפניך
דברי הימים א 17 : 25 (ALEP)
כה כי אתה אלהי גלית את אזן עבדך לבנות לו בית על כן מצא עבדך להתפלל לפניך
דברי הימים א 17 : 26 (ALEP)
כו ועתה יהוה אתה הוא האלהים ותדבר על עבדך הטובה הזאת
דברי הימים א 17 : 27 (ALEP)
כז ועתה הואלת לברך את בית עבדך להיות לעולם לפניך כי אתה יהוה ברכת ומברך לעולם פ
❮
❯