דברי הימים א 15 : 1 (ALEP)
א ויעש לו בתים בעיר דויד ויכן מקום לארון האלהים ויט לו אהל
דברי הימים א 15 : 2 (ALEP)
ב אז אמר דויד לא לשאת את ארון האלהים כי אם הלוים כי בם בחר יהוה לשאת את ארון יהוה ולשרתו--עד עולם פ
דברי הימים א 15 : 3 (ALEP)
ג ויקהל דויד את כל ישראל אל ירושלם להעלות את ארון יהוה אל מקומו אשר הכין לו
דברי הימים א 15 : 4 (ALEP)
ד ויאסף דויד את בני אהרן ואת הלוים ס
דברי הימים א 15 : 5 (ALEP)
ה לבני קהת--אוריאל השר ואחיו מאה ועשרים ס
דברי הימים א 15 : 6 (ALEP)
ו לבני מררי--עשיה השר ואחיו מאתים ועשרים ס
דברי הימים א 15 : 7 (ALEP)
ז לבני גרשום--יואל השר ואחיו מאה ושלשים ס
דברי הימים א 15 : 8 (ALEP)
ח לבני אליצפן--שמעיה השר ואחיו מאתים ס
דברי הימים א 15 : 9 (ALEP)
ט לבני חברון--אליאל השר ואחיו שמונים ס
דברי הימים א 15 : 10 (ALEP)
י לבני עזיאל עמינדב השר--ואחיו מאה ושנים עשר פ
דברי הימים א 15 : 11 (ALEP)
יא ויקרא דויד לצדוק ולאביתר הכהנים וללוים לאוריאל עשיה ויואל שמעיה ואליאל ועמינדב ס
דברי הימים א 15 : 12 (ALEP)
יב ויאמר להם אתם ראשי האבות ללוים התקדשו אתם ואחיכם והעליתם את ארון יהוה אלהי ישראל אל הכינותי לו
דברי הימים א 15 : 13 (ALEP)
יג כי למבראשונה לא אתם--פרץ יהוה אלהינו בנו כי לא דרשנהו כמשפט
דברי הימים א 15 : 14 (ALEP)
יד ויתקדשו הכהנים והלוים להעלות את ארון יהוה אלהי ישראל
דברי הימים א 15 : 15 (ALEP)
טו וישאו בני הלוים את ארון האלהים כאשר צוה משה כדבר יהוה--בכתפם במטות עליהם פ
דברי הימים א 15 : 16 (ALEP)
טז ויאמר דויד לשרי הלוים להעמיד את אחיהם המשררים בכלי שיר נבלים וכנרות ומצלתים--משמיעים להרים בקול לשמחה פ
דברי הימים א 15 : 17 (ALEP)
יז ויעמידו הלוים את הימן בן יואל ומן אחיו אסף בן ברכיהו ס ומן בני מררי אחיהם איתן בן קושיהו
דברי הימים א 15 : 18 (ALEP)
יח ועמהם אחיהם המשנים זכריהו בן ויעזיאל ושמירמות ויחיאל ועני אליאב ובניהו ומעשיהו ומתתיהו ואליפלהו ומקניהו ועבד אדם ויעיאל--השערים
דברי הימים א 15 : 19 (ALEP)
יט והמשררים הימן אסף ואיתן--במצלתים נחשת להשמיע
דברי הימים א 15 : 20 (ALEP)
כ וזכריה ועזיאל ושמירמות ויחיאל ועני ואליאב ומעשיהו ובניהו--בנבלים על עלמות
דברי הימים א 15 : 21 (ALEP)
כא ומתתיהו ואליפלהו ומקניהו ועבד אדם ויעיאל ועזזיהו--בכנרות על השמינית לנצח
דברי הימים א 15 : 22 (ALEP)
כב וכנניהו שר הלוים במשא--יסר במשא כי מבין הוא
דברי הימים א 15 : 23 (ALEP)
כג וברכיה ואלקנה שערים לארון
דברי הימים א 15 : 24 (ALEP)
כד ושבניהו ויושפט ונתנאל ועמשי וזכריהו ובניהו ואליעזר הכהנים מחצצרים (מחצרים) בחצצרות לפני ארון האלהים ועבד אדם ויחיה שערים לארון
דברי הימים א 15 : 25 (ALEP)
כה ויהי דויד וזקני ישראל ושרי האלפים ההלכים להעלות את ארון ברית יהוה מן בית עבד אדם--בשמחה פ
דברי הימים א 15 : 26 (ALEP)
כו ויהי בעזר האלהים את הלוים נשאי ארון ברית יהוה ויזבחו שבעה פרים ושבעה אילים
דברי הימים א 15 : 27 (ALEP)
כז ודויד מכרבל במעיל בוץ וכל הלוים הנשאים את הארון והמשררים וכנניה השר המשא המשררים ועל דויד אפוד בד
דברי הימים א 15 : 28 (ALEP)
כח וכל ישראל מעלים את ארון ברית יהוה בתרועה ובקול שופר ובחצצרות ובמצלתים משמעים בנבלים וכנרות
דברי הימים א 15 : 29 (ALEP)
כט ויהי ארון ברית יהוה בא עד עיר דויד ומיכל בת שאול נשקפה בעד החלון ותרא את המלך דויד מרקד ומשחק ותבז לו בלבה פ
❮
❯