דברי הימים א 14 : 1 (ALEP)
א וישלח חירם (חורם) מלך צר מלאכים אל דויד ועצי ארזים וחרשי קיר וחרשי עצים--לבנות לו בית
דברי הימים א 14 : 2 (ALEP)
ב וידע דויד כי הכינו יהוה למלך על ישראל כי נשאת למעלה מלכותו בעבור עמו ישראל ס
דברי הימים א 14 : 3 (ALEP)
ג ויקח דויד עוד נשים בירושלם ויולד דויד עוד בנים ובנות
דברי הימים א 14 : 4 (ALEP)
ד ואלה שמות הילודים אשר היו לו בירושלם שמוע ושובב נתן ושלמה
דברי הימים א 14 : 5 (ALEP)
ה ויבחר ואלישוע ואלפלט
דברי הימים א 14 : 6 (ALEP)
ו ונגה ונפג ויפיע
דברי הימים א 14 : 7 (ALEP)
ז ואלישמע ובעלידע ואליפלט פ
דברי הימים א 14 : 8 (ALEP)
ח וישמעו פלשתים כי נמשח דויד למלך על כל ישראל ויעלו כל פלשתים לבקש את דויד וישמע דויד ויצא לפניהם
דברי הימים א 14 : 9 (ALEP)
ט ופלשתים באו ויפשטו בעמק רפאים
דברי הימים א 14 : 10 (ALEP)
י וישאל דויד באלהים לאמר--האעלה על פלשתיים (פלשתים) ונתתם בידי ויאמר לו יהוה עלה ונתתים בידך
דברי הימים א 14 : 11 (ALEP)
יא ויעלו בבעל פרצים ויכם שם דויד ויאמר דויד פרץ האלהים את אויבי בידי כפרץ מים על כן קראו שם המקום ההוא--בעל פרצים
דברי הימים א 14 : 12 (ALEP)
יב ויעזבו שם את אלהיהם ויאמר דויד וישרפו באש פ
דברי הימים א 14 : 13 (ALEP)
יג ויסיפו עוד פלשתים ויפשטו בעמק
דברי הימים א 14 : 14 (ALEP)
יד וישאל עוד דויד באלהים ויאמר לו האלהים לא תעלה אחריהם הסב מעליהם ובאת להם ממול הבכאים
דברי הימים א 14 : 15 (ALEP)
טו ויהי כשמעך את קול הצעדה בראשי הבכאים--אז תצא במלחמה כי יצא האלהים לפניך להכות את מחנה פלשתים
דברי הימים א 14 : 16 (ALEP)
טז ויעש דויד כאשר צוהו האלהים ויכו את מחנה פלשתים מגבעון ועד גזרה
דברי הימים א 14 : 17 (ALEP)
יז ויצא שם דויד בכל הארצות ויהוה נתן את פחדו על כל הגוים
❮
❯