תהלים

1 א יהוה מלך ירגזו עמים ישב כרובים תנוט הארץ

2 ב יהוה בציון גדול ורם הוא על-כל-העמים

3 ג יודו שמך גדול ונורא קדוש הוא

4 ד ועז מלך משפט אהב אתה כוננת מישרים משפט וצדקה ביעקב אתה עשית

5 ה רוממו יהוה אלהינו והשתחוו להדם רגליו קדוש הוא

6 ו משה ואהרן בכהניו ושמואל בקראי שמו קראים אל-יהוה והוא יענם

7 ז בעמוד ענן ידבר אליהם שמרו עדתיו וחק נתן-למו

8 ח יהוה אלהינו אתה עניתם אל נשא היית להם ונקם על-עלילותם

9 ט רוממו יהוה אלהינו והשתחוו להר קדשו כי-קדוש יהוה אלהינו

Hebrew Bible