תהלים פֶּרֶק 86

1 א   תפלה לדוד הטה-יהוה אזנך ענני--    כי-עני ואביון אני

2 ב   שמרה נפשי    כי-חסיד אני הושע עבדך אתה אלהי--    הבוטח אליך

3 ג   חנני אדני    כי אליך אקרא כל-היום

4 ד   שמח נפש עבדך    כי אליך אדני נפשי אשא

5 ה   כי-אתה אדני טוב וסלח    ורב-חסד לכל-קראיך

תהלים פֶּרֶק 86

6 ו   האזינה יהוה תפלתי    והקשיבה בקול תחנונותי

7 ז   ביום צרתי אקראך    כי תענני

8 ח   אין-כמוך באלהים אדני    ואין כמעשיך

9 ט   כל-גוים אשר עשית--יבואו וישתחוו לפניך אדני    ויכבדו לשמך

10 י   כי-גדול אתה ועשה נפלאות    אתה אלהים לבדך

11 יא   הורני יהוה דרכך--    אהלך באמתך יחד לבבי    ליראה שמך

תהלים פֶּרֶק 86

12 יב   אודך אדני אלהי--בכל-לבבי    ואכבדה שמך לעולם

13 יג   כי-חסדך גדול עלי    והצלת נפשי משאול תחתיה

14 יד   אלהים זדים קמו-עלי    ועדת עריצים בקשו נפשי ולא שמוך    לנגדם

15 טו   ואתה אדני אל-רחום וחנון    ארך אפים ורב-חסד ואמת

16 טז   פנה אלי וחנני    תנה-עזך לעבדך והושיעה לבן-אמתך

תהלים פֶּרֶק 86

17 יז   עשה-עמי אות    לטובה ויראו שנאי ויבשו--    כי-אתה יהוה עזרתני ונחמתני