תהלים פֶּרֶק 73

1 א   מזמור לאסף אך טוב לישראל אלהים--    לברי לבב

2 ב   ואני--כמעט נטוי (נטיו) רגלי    כאין שפכה (שפכו) אשרי

3 ג   כי-קנאתי בהוללים    שלום רשעים אראה

4 ד   כי אין חרצבות למותם    ובריא אולם

5 ה   בעמל אנוש אינמו    ועם-אדם לא ינגעו

6 ו   לכן ענקתמו גאוה    יעטף-שית חמס למו

תהלים פֶּרֶק 73

7 ז   יצא מחלב עינמו    עברו משכיות לבב

8 ח   ימיקו וידברו ברע עשק    ממרום ידברו

9 ט   שתו בשמים פיהם    ולשונם תהלך בארץ

10 י   לכן ישיב (ישוב) עמו הלם    ומי מלא ימצו למו

11 יא   ואמרו איכה ידע-אל    ויש דעה בעליון

12 יב   הנה-אלה רשעים    ושלוי עולם השגו-חיל

תהלים פֶּרֶק 73

13 יג   אך-ריק זכיתי לבבי    וארחץ בנקיון כפי

14 יד   ואהי נגוע כל-היום    ותוכחתי לבקרים

15 טו   אם-אמרתי אספרה כמו    הנה דור בניך בגדתי

16 טז   ואחשבה לדעת זאת    עמל היא (הוא) בעיני

17 יז   עד-אבוא אל-מקדשי-אל    אבינה לאחריתם

18 יח   אך בחלקות תשית למו    הפלתם למשואות

תהלים פֶּרֶק 73

19 יט   איך היו לשמה כרגע    ספו תמו מן-בלהות

20 כ   כחלום מהקיץ--    אדני בעיר צלמם תבזה

21 כא   כי יתחמץ לבבי    וכליותי אשתונן

22 כב   ואני-בער ולא אדע    בהמות הייתי עמך

23 כג   ואני תמיד עמך    אחזת ביד-ימיני

24 כד   בעצתך תנחני    ואחר כבוד תקחני

תהלים פֶּרֶק 73

25 כה   מי-לי בשמים    ועמך לא-חפצתי בארץ

26 כו   כלה שארי ולבבי    צור-לבבי וחלקי--אלהים לעולם

27 כז   כי-הנה רחקיך יאבדו    הצמתה כל-זונה ממך

28 כח   ואני קרבת אלהים--    לי-טוב שתי באדני יהוה מחסי    לספר כל-מלאכותיך