תהלים פֶּרֶק 29

1 א   מזמור לדוד    הבו ליהוה בני אלים הבו ליהוה כבוד ועז

2 ב   הבו ליהוה כבוד שמו    השתחוו ליהוה בהדרת-קדש

3 ג   קול יהוה    על-המים אל-הכבוד הרעים    יהוה על-מים רבים

4 ד   קול-יהוה בכח    קול יהוה בהדר

5 ה   קול יהוה שבר ארזים    וישבר יהוה את-ארזי הלבנון

תהלים פֶּרֶק 29

6 ו   וירקידם כמו-עגל    לבנון ושרין כמו בן-ראמים

7 ז   קול-יהוה חצב    להבות אש

8 ח   קול יהוה יחיל מדבר    יחיל יהוה מדבר קדש

9 ט   קול יהוה יחולל אילות--    ויחשף יערות ובהיכלו--    כלו אמר כבוד

10 י   יהוה למבול ישב    וישב יהוה מלך לעולם

11 יא   יהוה--עז לעמו יתן    יהוה יברך את-עמו בשלום