תהלים פֶּרֶק 147

1 א   הללו-יה כי-טוב זמרה אלהינו--    כי-נעים נאוה תהלה

2 ב   בונה ירושלם יהוה    נדחי ישראל יכנס

3 ג   הרפא לשבורי לב    ומחבש לעצבותם

4 ד   מונה מספר לכוכבים    לכלם שמות יקרא

5 ה   גדול אדונינו ורב-כח    לתבונתו אין מספר

6 ו   מעודד ענוים יהוה    משפיל רשעים עדי-ארץ

תהלים פֶּרֶק 147

7 ז   ענו ליהוה בתודה    זמרו לאלהינו בכנור

8 ח   המכסה שמים בעבים--    המכין לארץ מטר המצמיח הרים    חציר

9 ט   נותן לבהמה לחמה    לבני ערב אשר יקראו

10 י   לא בגבורת הסוס יחפץ    לא-בשוקי האיש ירצה

11 יא   רוצה יהוה את-יראיו--    את-המיחלים לחסדו

12 יב   שבחי ירושלם את-יהוה    הללי אלהיך ציון

תהלים פֶּרֶק 147

13 יג   כי-חזק בריחי שעריך    ברך בניך בקרבך

14 יד   השם-גבולך שלום    חלב חטים ישביעך

15 טו   השלח אמרתו ארץ    עד-מהרה ירוץ דברו

16 טז   הנתן שלג כצמר    כפור כאפר יפזר

17 יז   משליך קרחו כפתים    לפני קרתו מי יעמד

18 יח   ישלח דברו וימסם    ישב רוחו יזלו-מים

תהלים פֶּרֶק 147

19 יט   מגיד דברו ליעקב    חקיו ומשפטיו לישראל

20 כ   לא עשה כן לכל-גוי--    ומשפטים בל-ידעום הללו-יה