תהלים פֶּרֶק 144

1 א   לדוד  ברוך יהוה צורי--    המלמד ידי לקרב אצבעותי    למלחמה

2 ב   חסדי ומצודתי    משגבי ומפלטי-לי מגני ובו חסיתי    הרודד עמי תחתי

3 ג   יהוה--מה-אדם ותדעהו    בן-אנוש ותחשבהו

4 ד   אדם להבל דמה    ימיו כצל עובר

5 ה   יהוה הט-שמיך ותרד    גע בהרים ויעשנו

תהלים פֶּרֶק 144

6 ו   ברוק ברק ותפיצם    שלח חציך ותהמם

7 ז   שלח ידיך ממרום    פצני והצילני ממים רבים מיד בני נכר

8 ח   אשר פיהם דבר-שוא    וימינם ימין שקר

9 ט   אלהים--שיר חדש אשירה לך    בנבל עשור אזמרה-לך

10 י   הנותן תשועה למלכים    הפוצה את-דוד עבדו--מחרב רעה

11 יא   פצני והצילני    מיד בני-נכר אשר פיהם דבר-שוא    וימינם ימין שקר

תהלים פֶּרֶק 144

12 יב   אשר בנינו כנטעים--    מגדלים בנעוריהם בנותינו כזוית--    מחטבות תבנית היכל

13 יג   מזוינו מלאים--    מפיקים מזן אל-זן צאוננו מאליפות מרבבות--    בחוצותינו

14 יד   אלופינו מסבלים    אין-פרץ ואין יוצאת ואין צוחה ברחבתינו

15 טו   אשרי העם שככה לו    אשרי העם שיהוה אלהיו