תהלים פֶּרֶק 139

1 א   למנצח לדוד מזמור יהוה חקרתני    ותדע

2 ב   אתה ידעת שבתי וקומי    בנתה לרעי מרחוק

3 ג   ארחי ורבעי זרית    וכל-דרכי הסכנתה

4 ד   כי אין מלה בלשוני    הן יהוה ידעת כלה

5 ה   אחור וקדם צרתני    ותשת עלי כפכה

6 ו   פלאיה (פליאה) דעת ממני    נשגבה לא-אוכל לה

תהלים פֶּרֶק 139

7 ז   אנה אלך מרוחך    ואנה מפניך אברח

8 ח   אם אסק שמים שם אתה    ואציעה שאול הנך

9 ט   אשא כנפי-שחר    אשכנה באחרית ים

10 י   גם-שם ידך תנחני    ותאחזני ימינך

11 יא   ואמר אך-חשך ישופני    ולילה אור בעדני

12 יב   גם-חשך    לא-יחשיך ממך ולילה כיום יאיר--    כחשיכה כאורה

תהלים פֶּרֶק 139

13 יג   כי-אתה קנית כליתי    תסכני בבטן אמי

14 יד   אודך--    על כי נוראות נפליתי נפלאים מעשיך    ונפשי ידעת מאד

15 טו   לא-נכחד עצמי    ממך אשר-עשיתי בסתר    רקמתי בתחתיות ארץ

16 טז   גלמי ראו עיניך    ועל-ספרך כלם יכתבו ימים יצרו    ולא (ולו) אחד בהם

17 יז   ולי--מה-יקרו רעיך אל    מה עצמו ראשיהם

תהלים פֶּרֶק 139

18 יח   אספרם מחול ירבון    הקיצתי ועודי עמך

19 יט   אם-תקטל אלוה רשע    ואנשי דמים סורו מני

20 כ   אשר ימרוך למזמה    נשוא לשוא עריך

21 כא   הלוא-משנאיך יהוה אשנא    ובתקוממיך אתקוטט

22 כב   תכלית שנאה שנאתים    לאויבים היו לי

23 כג   חקרני אל ודע לבבי    בחנני ודע שרעפי

תהלים פֶּרֶק 139

24 כד   וראה אם-דרך-עצב בי    ונחני בדרך עולם