תהלים פֶּרֶק 118

1 א   הודו ליהוה כי-טוב    כי לעולם חסדו

2 ב   יאמר-נא ישראל    כי לעולם חסדו

3 ג   יאמרו-נא בית-אהרן    כי לעולם חסדו

4 ד   יאמרו-נא יראי יהוה    כי לעולם חסדו

5 ה   מן-המצר קראתי יה    ענני במרחב יה

6 ו   יהוה לי לא אירא    מה-יעשה לי אדם

תהלים פֶּרֶק 118

7 ז   יהוה לי בעזרי    ואני אראה בשנאי

8 ח   טוב לחסות ביהוה--    מבטח באדם

9 ט   טוב לחסות ביהוה--    מבטח בנדיבים

10 י   כל-גוים סבבוני    בשם יהוה כי אמילם

11 יא   סבוני גם-סבבוני    בשם יהוה כי אמילם

12 יב   סבוני כדבורים--    דעכו כאש קוצים בשם יהוה    כי אמילם

תהלים פֶּרֶק 118

13 יג   דחה דחיתני לנפל    ויהוה עזרני

14 יד   עזי וזמרת יה    ויהי-לי לישועה

15 טו   קול רנה וישועה--באהלי צדיקים    ימין יהוה עשה חיל

16 טז   ימין יהוה רוממה    ימין יהוה עשה חיל

17 יז   לא-אמות כי-אחיה    ואספר מעשי יה

18 יח   יסר יסרני יה    ולמות לא נתנני

תהלים פֶּרֶק 118

19 יט   פתחו-לי שערי-צדק    אבא-בם אודה יה

20 כ   זה-השער ליהוה    צדיקים יבאו בו

21 כא   אודך כי עניתני    ותהי-לי לישועה

22 כב   אבן מאסו הבונים--    היתה לראש פנה

23 כג   מאת יהוה היתה זאת    היא נפלאת בעינינו

24 כד   זה-היום עשה יהוה    נגילה ונשמחה בו

תהלים פֶּרֶק 118

25 כה   אנא יהוה הושיעה נא    אנא יהוה הצליחה נא

26 כו   ברוך הבא בשם יהוה    ברכנוכם מבית יהוה

27 כז   אל יהוה--ויאר-לנו    אסרו-חג בעבתים--עד קרנות המזבח

28 כח   אלי אתה ואודך    אלהי ארוממך

29 כט   הודו ליהוה כי-טוב    כי לעולם חסדו