תהלים פֶּרֶק 106

1 א   הללו-יה הודו ליהוה כי-טוב--    כי לעולם חסדו

2 ב   מי--ימלל גבורות יהוה    ישמיע כל-תהלתו

3 ג   אשרי שמרי משפט    עשה צדקה בכל-עת

4 ד   זכרני יהוה ברצון עמך    פקדני בישועתך

5 ה   לראות בטובת בחיריך--    לשמח בשמחת גויך להתהלל    עם-נחלתך

6 ו   חטאנו עם-אבותינו    העוינו הרשענו

תהלים פֶּרֶק 106

7 ז   אבותינו במצרים    לא-השכילו נפלאותיך-- לא זכרו    את-רב חסדיך וימרו על-ים    בים-סוף

8 ח   ויושיעם למען שמו--    להודיע את-גבורתו

9 ט   ויגער בים-סוף ויחרב    ויוליכם בתהמות כמדבר

10 י   ויושיעם מיד שונא    ויגאלם מיד אויב

11 יא   ויכסו-מים צריהם    אחד מהם לא נותר

תהלים פֶּרֶק 106

12 יב   ויאמינו בדבריו    ישירו תהלתו

13 יג   מהרו שכחו מעשיו    לא-חכו לעצתו

14 יד   ויתאוו תאוה במדבר    וינסו-אל בישימון

15 טו   ויתן להם שאלתם    וישלח רזון בנפשם

16 טז   ויקנאו למשה במחנה    לאהרן קדוש יהוה

17 יז   תפתח-ארץ ותבלע דתן    ותכס על-עדת אבירם

תהלים פֶּרֶק 106

18 יח   ותבער-אש בעדתם    להבה תלהט רשעים

19 יט   יעשו-עגל בחרב    וישתחוו למסכה

20 כ   וימירו את-כבודם    בתבנית שור אכל עשב

21 כא   שכחו אל מושיעם--    עשה גדלות במצרים

22 כב   נפלאות בארץ חם    נוראות על-ים-סוף

23 כג   ויאמר    להשמידם לולי משה בחירו--    עמד בפרץ לפניו להשיב חמתו    מהשחית

תהלים פֶּרֶק 106

24 כד   וימאסו בארץ חמדה    לא-האמינו לדברו

25 כה   וירגנו באהליהם    לא שמעו בקול יהוה

26 כו   וישא ידו להם--    להפיל אותם במדבר

27 כז   ולהפיל זרעם בגוים    ולזרותם בארצות

28 כח   ויצמדו לבעל פעור    ויאכלו זבחי מתים

29 כט   ויכעיסו במעלליהם    ותפרץ-בם מגפה

תהלים פֶּרֶק 106

30 ל   ויעמד פינחס ויפלל    ותעצר המגפה

31 לא   ותחשב לו לצדקה    לדר ודר עד-עולם

32 לב   ויקציפו על-מי מריבה    וירע למשה בעבורם

33 לג   כי-המרו את-רוחו    ויבטא בשפתיו

34 לד   לא-השמידו את-העמים--    אשר אמר יהוה להם

35 לה   ויתערבו בגוים    וילמדו מעשיהם

תהלים פֶּרֶק 106

36 לו   ויעבדו את-עצביהם    ויהיו להם למוקש

37 לז   ויזבחו את-בניהם ואת-בנותיהם--    לשדים

38 לח   וישפכו דם נקי דם-בניהם ובנותיהם--    אשר זבחו לעצבי כנען ותחנף הארץ    בדמים

39 לט   ויטמאו במעשיהם    ויזנו במעלליהם

40 מ   ויחר-אף יהוה בעמו    ויתעב את-נחלתו

תהלים פֶּרֶק 106

41 מא   ויתנם ביד-גוים    וימשלו בהם שנאיהם

42 מב   וילחצום אויביהם    ויכנעו תחת ידם

43 מג   פעמים רבות    יצילם והמה ימרו בעצתם    וימכו בעונם

44 מד   וירא בצר להם--    בשמעו את-רנתם

45 מה   ויזכר להם בריתו    וינחם כרב חסדו

46 מו   ויתן אותם לרחמים--    לפני כל-שוביהם

תהלים פֶּרֶק 106

47 מז   הושיענו יהוה אלהינו    וקבצנו מן-הגוים להדות לשם קדשך    להשתבח בתהלתך

48 מח   ברוך יהוה אלהי ישראל    מן-העולם ועד העולם-- ואמר כל-העם    אמן הללו-יה