תהלים פֶּרֶק 105

1 א   הודו ליהוה קראו בשמו    הודיעו בעמים עלילותיו

2 ב   שירו-לו זמרו-לו    שיחו בכל-נפלאותיו

3 ג   התהללו בשם קדשו    ישמח לב מבקשי יהוה

4 ד   דרשו יהוה ועזו    בקשו פניו תמיד

5 ה   זכרו--נפלאותיו אשר-עשה    מפתיו ומשפטי-פיו

6 ו   זרע אברהם עבדו    בני יעקב בחיריו

תהלים פֶּרֶק 105

7 ז   הוא יהוה אלהינו    בכל-הארץ משפטיו

8 ח   זכר לעולם בריתו    דבר צוה לאלף דור

9 ט   אשר כרת את-אברהם    ושבועתו לישחק

10 י   ויעמידה ליעקב לחק    לישראל ברית עולם

11 יא   לאמר--לך אתן את-ארץ-כנען    חבל נחלתכם

12 יב   בהיותם מתי מספר    כמעט וגרים בה

תהלים פֶּרֶק 105

13 יג   ויתהלכו מגוי אל-גוי    מממלכה אל-עם אחר

14 יד   לא-הניח אדם לעשקם    ויוכח עליהם מלכים

15 טו   אל-תגעו במשיחי    ולנביאי אל-תרעו

16 טז   ויקרא רעב על-הארץ    כל-מטה-לחם שבר

17 יז   שלח לפניהם איש    לעבד נמכר יוסף

18 יח   ענו בכבל רגליו (רגלו)    ברזל באה נפשו

תהלים פֶּרֶק 105

19 יט   עד-עת בא-דברו--    אמרת יהוה צרפתהו

20 כ   שלח מלך ויתירהו    משל עמים ויפתחהו

21 כא   שמו אדון לביתו    ומשל בכל-קנינו

22 כב   לאסר שריו בנפשו    וזקניו יחכם

23 כג   ויבא ישראל מצרים    ויעקב גר בארץ-חם

24 כד   ויפר את-עמו מאד    ויעצמהו מצריו

תהלים פֶּרֶק 105

25 כה   הפך לבם לשנא עמו    להתנכל בעבדיו

26 כו   שלח משה עבדו    אהרן אשר בחר-בו

27 כז   שמו-בם דברי אתותיו    ומפתים בארץ חם

28 כח   שלח חשך ויחשך    ולא-מרו את-דבריו (דברו)

29 כט   הפך את-מימיהם לדם    וימת את-דגתם

30 ל   שרץ ארצם צפרדעים    בחדרי מלכיהם

תהלים פֶּרֶק 105

31 לא   אמר ויבא ערב    כנים בכל-גבולם

32 לב   נתן גשמיהם ברד    אש להבות בארצם

33 לג   ויך גפנם ותאנתם    וישבר עץ גבולם

34 לד   אמר ויבא ארבה    וילק ואין מספר

35 לה   ויאכל כל-עשב בארצם    ויאכל פרי אדמתם

36 לו   ויך כל-בכור בארצם    ראשית לכל-אונם

תהלים פֶּרֶק 105

37 לז   ויוציאם בכסף וזהב    ואין בשבטיו כושל

38 לח   שמח מצרים בצאתם    כי-נפל פחדם עליהם

39 לט   פרש ענן למסך    ואש להאיר לילה

40 מ   שאל ויבא שלו    ולחם שמים ישביעם

41 מא   פתח צור ויזובו מים    הלכו בציות נהר

42 מב   כי-זכר את-דבר קדשו    את-אברהם עבדו

תהלים פֶּרֶק 105

43 מג   ויוצא עמו בששון    ברנה את-בחיריו

44 מד   ויתן להם ארצות גוים    ועמל לאמים יירשו

45 מה   בעבור ישמרו חקיו--    ותורתיו ינצרו הללו-יה