תהלים פֶּרֶק 103

1 א   לדוד  ברכי נפשי את-יהוה    וכל-קרבי את-שם קדשו

2 ב   ברכי נפשי את-יהוה    ואל-תשכחי כל-גמוליו

3 ג   הסלח לכל-עונכי    הרפא לכל-תחלואיכי

4 ד   הגואל משחת חייכי    המעטרכי חסד ורחמים

5 ה   המשביע בטוב עדיך    תתחדש כנשר נעוריכי

6 ו   עשה צדקות יהוה    ומשפטים לכל-עשוקים

תהלים פֶּרֶק 103

7 ז   יודיע דרכיו למשה    לבני ישראל עלילותיו

8 ח   רחום וחנון יהוה    ארך אפים ורב-חסד

9 ט   לא-לנצח יריב    ולא לעולם יטור

10 י   לא כחטאינו עשה לנו    ולא כעונתינו גמל עלינו

11 יא   כי כגבה שמים על-הארץ--    גבר חסדו על-יראיו

12 יב   כרחק מזרח ממערב--    הרחיק ממנו את-פשעינו

תהלים פֶּרֶק 103

13 יג   כרחם אב על-בנים--    רחם יהוה על-יראיו

14 יד   כי-הוא ידע יצרנו    זכור כי-עפר אנחנו

15 טו   אנוש כחציר ימיו    כציץ השדה כן יציץ

16 טז   כי רוח עברה-בו ואיננו    ולא-יכירנו עוד מקומו

17 יז   וחסד יהוה מעולם ועד-עולם--    על-יראיו וצדקתו    לבני בנים

18 יח   לשמרי בריתו    ולזכרי פקדיו לעשותם

תהלים פֶּרֶק 103

19 יט   יהוה--בשמים הכין כסאו    ומלכותו בכל משלה

20 כ   ברכו יהוה    מלאכיו גברי כח עשי דברו    לשמע בקול דברו

21 כא   ברכו יהוה כל-צבאיו--    משרתיו עשי רצונו

22 כב   ברכו יהוה כל-מעשיו--    בכל-מקמות ממשלתו ברכי נפשי    את-יהוה