משלי פֶּרֶק 4

1 א   שמעו בנים מוסר אב    והקשיבו לדעת בינה

2 ב   כי לקח טוב נתתי לכם    תורתי אל-תעזבו

3 ג   כי-בן הייתי לאבי    רך ויחיד לפני אמי

4 ד   וירני--ויאמר לי יתמך-דברי לבך    שמר מצותי וחיה

5 ה   קנה חכמה קנה בינה    אל-תשכח ואל-תט מאמרי-פי

6 ו   אל-תעזבה ותשמרך    אהבה ותצרך

משלי פֶּרֶק 4

7 ז   ראשית חכמה קנה חכמה    ובכל-קנינך קנה בינה

8 ח   סלסלה ותרוממך    תכבדך כי תחבקנה

9 ט   תתן לראשך לוית-חן    עטרת תפארת תמגנך

10 י   שמע בני וקח אמרי    וירבו לך שנות חיים

11 יא   בדרך חכמה הריתיך    הדרכתיך במעגלי-ישר

12 יב   בלכתך לא-יצר צעדך    ואם-תרוץ לא תכשל

משלי פֶּרֶק 4

13 יג   החזק במוסר אל-תרף    נצרה כי-היא חייך

14 יד   בארח רשעים אל-תבא    ואל-תאשר בדרך רעים

15 טו   פרעהו אל-תעבר-בו    שטה מעליו ועבר

16 טז   כי לא ישנו אם-לא ירעו    ונגזלה שנתם אם-לא יכשולו (יכשילו)

17 יז   כי לחמו לחם רשע    ויין חמסים ישתו

18 יח   וארח צדיקים כאור נגה    הולך ואור עד-נכון היום

משלי פֶּרֶק 4

19 יט   דרך רשעים כאפלה    לא ידעו במה יכשלו

20 כ   בני לדברי הקשיבה    לאמרי הט-אזנך

21 כא   אל-יליזו מעיניך    שמרם בתוך לבבך

22 כב   כי-חיים הם למצאיהם    ולכל-בשרו מרפא

23 כג   מכל-משמר נצר לבך    כי-ממנו תוצאות חיים

24 כד   הסר ממך עקשות פה    ולזות שפתים הרחק ממך

משלי פֶּרֶק 4

25 כה   עיניך לנכח יביטו    ועפעפיך יישרו נגדך

26 כו   פלס מעגל רגלך    וכל-דרכיך יכנו

27 כז   אל-תט-ימין ושמאול    הסר רגלך מרע