משלי פֶּרֶק 1

1 א    מ שלי שלמה בן-דוד--    מלך ישראל

2 ב   לדעת חכמה ומוסר    להבין אמרי בינה

3 ג   לקחת מוסר השכל    צדק ומשפט ומשרים

4 ד   לתת לפתאים ערמה    לנער דעת ומזמה

5 ה   ישמע חכם ויוסף לקח    ונבון תחבלות יקנה

6 ו   להבין משל ומליצה    דברי חכמים וחידתם

משלי פֶּרֶק 1

7 ז   יראת יהוה ראשית דעת    חכמה ומוסר אוילים בזו

8 ח   שמע בני מוסר אביך    ואל-תטש תורת אמך

9 ט   כי לוית חן הם לראשך    וענקים לגרגרתך

10 י   בני--    אם-יפתוך חטאים אל-תבא

11 יא   אם-יאמרו    לכה אתנו נארבה לדם    נצפנה לנקי חנם

12 יב   נבלעם כשאול חיים    ותמימים כיורדי בור

משלי פֶּרֶק 1

13 יג   כל-הון יקר נמצא    נמלא בתינו שלל

14 יד   גורלך תפיל בתוכנו    כיס אחד יהיה לכלנו

15 טו   בני--אל-תלך בדרך אתם    מנע רגלך מנתיבתם

16 טז   כי רגליהם לרע ירוצו    וימהרו לשפך-דם

17 יז   כי-חנם מזרה הרשת--    בעיני כל-בעל כנף

18 יח   והם לדמם יארבו    יצפנו לנפשתם

משלי פֶּרֶק 1

19 יט   כן--ארחות כל-בצע בצע    את-נפש בעליו יקח

20 כ   חכמות בחוץ תרנה    ברחבות תתן קולה

21 כא   בראש המיות תקרא    בפתחי שערים בעיר--אמריה תאמר

22 כב   עד-מתי פתים--    תאהבו-פתי ולצים--לצון חמדו להם    וכסילים ישנאו-דעת

23 כג   תשובו לתוכחתי    הנה אביעה לכם רוחי אודיעה דברי אתכם

משלי פֶּרֶק 1

24 כד   יען קראתי ותמאנו    נטיתי ידי ואין מקשיב

25 כה   ותפרעו כל-עצתי    ותוכחתי לא אביתם

26 כו   גם-אני באידכם אשחק    אלעג בבא פחדכם

27 כז   בבא כשאוה (כשואה) פחדכם--    ואידכם כסופה יאתה בבא עליכם    צרה וצוקה

28 כח   אז יקראנני ולא אענה    ישחרנני ולא ימצאנני

משלי פֶּרֶק 1

29 כט   תחת כי-שנאו דעת    ויראת יהוה לא בחרו

30 ל   לא-אבו לעצתי    נאצו כל-תוכחתי

31 לא   ויאכלו מפרי דרכם    וממעצתיהם ישבעו

32 לב   כי משובת פתים תהרגם    ושלות כסילים תאבדם

33 לג   ושמע לי ישכן-בטח    ושאנן מפחד רעה