איוב פֶּרֶק 8

1 א                   ויען בלדד השוחי ויאמר

2 ב   עד-אן תמלל-אלה    ורוח כביר אמרי-פיך

3 ג   האל יעות משפט    ואם-שדי יעות-צדק

4 ד   אם-בניך חטאו-לו    וישלחם ביד-פשעם

5 ה   אם-אתה תשחר אל-אל    ואל-שדי תתחנן

6 ו   אם-זך וישר אתה    כי-עתה יעיר עליך ושלם נות צדקך

איוב פֶּרֶק 8

7 ז   והיה ראשיתך מצער    ואחריתך ישגה מאד

8 ח   כי-שאל-נא לדר רישון    וכונן לחקר אבותם

9 ט   כי-תמול אנחנו ולא נדע    כי צל ימינו עלי-ארץ

10 י   הלא-הם יורוך יאמרו לך    ומלבם יוצאו מלים

11 יא   היגאה-גמא בלא בצה    ישגה-אחו בלי-מים

12 יב   עדנו באבו לא יקטף    ולפני כל-חציר ייבש

איוב פֶּרֶק 8

13 יג   כן--ארחות כל-שכחי אל    ותקות חנף תאבד

14 יד   אשר-יקוט כסלו    ובית עכביש מבטחו

15 טו   ישען על-ביתו ולא יעמד    יחזיק בו ולא יקום

16 טז   רטב הוא לפני-שמש    ועל גנתו ינקתו תצא

17 יז   על-גל שרשיו יסבכו    בית אבנים יחזה

18 יח   אם-יבלענו ממקמו    וכחש בו לא ראיתיך

איוב פֶּרֶק 8

19 יט   הן-הוא משוש דרכו    ומעפר אחר יצמחו

20 כ   הן-אל לא ימאס-תם    ולא-יחזיק ביד-מרעים

21 כא   עד-ימלה שחוק פיך    ושפתיך תרועה

22 כב   שנאיך ילבשו-בשת    ואהל רשעים איננו