איוב פֶּרֶק 34

1 א                   ויען אליהוא ויאמר

2 ב   שמעו חכמים מלי    וידעים האזינו לי

3 ג   כי-אזן מלין תבחן    וחך יטעם לאכל

4 ד   משפט נבחרה-לנו    נדעה בינינו מה-טוב

5 ה   כי-אמר איוב צדקתי    ואל הסיר משפטי

6 ו   על-משפטי אכזב    אנוש חצי בלי-פשע

איוב פֶּרֶק 34

7 ז   מי-גבר כאיוב    ישתה-לעג כמים

8 ח   וארח לחברה עם-פעלי און    וללכת עם-אנשי-רשע

9 ט   כי-אמר לא יסכן-גבר--    ברצתו עם-אלהים

10 י   לכן אנשי לבב--    שמעו-לי חללה לאל מרשע    ושדי מעול

11 יא   כי פעל אדם ישלם-לו    וכארח איש ימצאנו

12 יב   אף-אמנם אל לא-ירשיע    ושדי לא-יעות משפט

איוב פֶּרֶק 34

13 יג   מי-פקד עליו ארצה    ומי שם תבל כלה

14 יד   אם-ישים אליו לבו    רוחו ונשמתו אליו יאסף

15 טו   יגוע כל-בשר יחד    ואדם על-עפר ישוב

16 טז   ואם-בינה שמעה-זאת    האזינה לקול מלי

17 יז   האף שונא משפט יחבוש    ואם-צדיק כביר תרשיע

18 יח   האמר למלך בליעל--    רשע אל-נדיבים

איוב פֶּרֶק 34

19 יט   אשר לא-נשא פני שרים    ולא נכר-שוע לפני-דל כי-מעשה ידיו    כלם

20 כ   רגע ימתו--    וחצות לילה יגעשו עם ויעברו    ויסירו אביר לא ביד

21 כא   כי-עיניו על-דרכי-איש    וכל-צעדיו יראה

22 כב   אין-חשך ואין צלמות--    להסתר שם פעלי און

23 כג   כי לא על-איש ישים עוד--    להלך אל-אל במשפט

איוב פֶּרֶק 34

24 כד   ירע כבירים לא-חקר    ויעמד אחרים תחתם

25 כה   לכן--יכיר מעבדיהם    והפך לילה וידכאו

26 כו   תחת-רשעים ספקם--    במקום ראים

27 כז   אשר על-כן סרו מאחריו    וכל-דרכיו לא השכילו

28 כח   להביא עליו צעקת-דל    וצעקת עניים ישמע

29 כט   והוא ישקט ומי ירשע--    ויסתר פנים ומי ישורנו ועל-גוי ועל-אדם    יחד

איוב פֶּרֶק 34

30 ל   ממלך אדם חנף--    ממקשי עם

31 לא   כי-אל-אל האמר נשאתי--    לא אחבל

32 לב   בלעדי אחזה אתה הרני    אם-עול פעלתי לא אסיף

33 לג   המעמך ישלמנה כי-מאסת--כי-אתה תבחר ולא-אני    ומה-ידעת דבר

34 לד   אנשי לבב יאמרו לי    וגבר חכם שמע לי

35 לה   איוב לא-בדעת ידבר    ודבריו לא בהשכיל

איוב פֶּרֶק 34

36 לו   אבי--יבחן איוב עד-נצח    על-תשבת באנשי-און

37 לז   כי יסיף על-חטאתו פשע בינינו יספוק    וירב אמריו לאל