איוב פֶּרֶק 17

1 א   רוחי חבלה ימי נזעכו    קברים לי

2 ב   אם-לא התלים עמדי    ובהמרותם תלן עיני

3 ג   שימה-נא ערבני עמך    מי הוא לידי יתקע

4 ד   כי-לבם צפנת משכל    על-כן לא תרמם

5 ה   לחלק יגיד רעים    ועיני בניו תכלנה

6 ו   והציגני למשל עמים    ותפת לפנים אהיה

איוב פֶּרֶק 17

7 ז   ותכה מכעש עיני    ויצרי כצל כלם

8 ח   ישמו ישרים על-זאת    ונקי על-חנף יתערר

9 ט   ויאחז צדיק דרכו    וטהר-ידים יסיף אמץ

10 י   ואולם--כלם תשבו ובאו נא    ולא-אמצא בכם חכם

11 יא   ימי עברו זמתי נתקו--    מורשי לבבי

12 יב   לילה ליום ישימו    אור קרוב מפני-חשך

איוב פֶּרֶק 17

13 יג   אם-אקוה שאול ביתי    בחשך רפדתי יצועי

14 יד   לשחת קראתי אבי אתה    אמי ואחתי לרמה

15 טו   ואיה אפו תקותי    ותקותי מי ישורנה

16 טז   בדי שאל תרדנה    אם-יחד על-עפר נחת