איוב פֶּרֶק 16

1 א                   ויען איוב ויאמר

2 ב   שמעתי כאלה רבות    מנחמי עמל כלכם

3 ג   הקץ לדברי-רוח    או מה-ימריצך כי תענה

4 ד   גם אנכי--    ככם אדברה לו יש נפשכם תחת נפשי--    אחבירה עליכם במלים ואניעה עליכם    במו ראשי

5 ה   אאמצכם במו-פי    וניד שפתי יחשך

איוב פֶּרֶק 16

6 ו   אם-אדברה לא-יחשך כאבי    ואחדלה מה-מני יהלך

7 ז   אך-עתה הלאני    השמות כל-עדתי

8 ח   ותקמטני לעד היה    ויקם בי כחשי בפני יענה

9 ט   אפו טרף וישטמני--חרק עלי בשניו    צרי ילטש עיניו לי

10 י   פערו עלי בפיהם--בחרפה הכו לחיי    יחד עלי יתמלאון

11 יא   יסגירני אל אל עויל    ועל-ידי רשעים ירטני

איוב פֶּרֶק 16

12 יב   שלו הייתי ויפרפרני--    ואחז בערפי ויפצפצני ויקימני לו    למטרה

13 יג   יסבו עלי רביו--    יפלח כליותי ולא יחמל ישפך לארץ    מררתי

14 יד   יפרצני פרץ על-פני-פר ץ    ירץ עלי כגבור

15 טו   שק תפרתי עלי גלדי    ועללתי בעפר קרני

16 טז   פני חמרמרה (חמרמרו) מני-בכי    ועל עפעפי צלמות

איוב פֶּרֶק 16

17 יז   על לא-חמס בכפי    ותפלתי זכה

18 יח   ארץ אל-תכסי דמי    ואל-יהי מקום לזעקתי

19 יט   גם-עתה הנה-בשמים עדי    ושהדי במרמים

20 כ   מליצי רעי    אל-אלוה דלפה עיני

21 כא   ויוכח לגבר עם-אלוה    ובן-אדם לרעהו

22 כב   כי-שנות מספר יאתיו    וארח לא-אשוב אהלך